جڤاتا وەزیرێن هەرێما كوردستانێ ئەڤرۆ ب سەرپەرشتییا سەرۆکوەزیران مەسرور بارزانی و ب ئامادەبوونا قوباد تالەبانی، جێگرێ سەرۆکوەزیران كۆمبوون.
د بڕگا ئێكێ یا كۆمبوونێدا، ئامانج ڕەحیم، سکرتێرێ جڤاتا وەزیران بەحس ل ڕێکارێن دەستپێکرنا هنارتنا نەفتا هەرێما کوردستانێ و هویركارییێن دانوستاندنێن ئەڤێ دووماهییێ دناڤبەرا هەردوو حکومەت و کۆمپانییێن نەفتێ کر و ئاماژە ب هندێ کر د كۆمبوونێدا، شاندێ حکومەتا هەرێمێ دووپات كرییە كو ڕێكارێن زوی و میکانزما چارەسەرکرنا هەمی ئاریشە و بەربەستێن بەردەم دەستپێکرنا هنارتنا نەفتا هەرێمێ بهێنە دانان.
جڤاتا وەزیران دیاركر ژی، نابیت بەربەست ل بەردەم دەستپێكرنا هنارتنا نەفتا هەرێمێ هەبن و دخوازین د زویترین دەمدا بگەهنە ڕێككەفتنەكا دووماهییێ.
بڕگا دووێ یا كۆمبوونێدا، دانوستاندن بوو ل سەر بڕیارەكا حکومەتا فیدرال تایبەت ب دانانا دوو گۆڕەپانێن گومركی ل هەردوو پارێزگەهێن نەینەوا و دیالە کو کاریگەری ل سەر لڤینا بازرگانی ل دەروازەیێ سنوورییێ هەرێما کوردستانێ کر.
د بڕگا سیێ دا، دارا ڕەشید، وەزیرێ پلاندانانێ، ڕاپۆرتەكا بەرفرەهـ و تژی ژ پێزانین ل دۆر ئەنجامدانا سەرژمێرییا گشتییا ئاكنجییێن ل عیراق و هەرێما کوردستانێ پێشكێشكر کو بڕیارە ل هەیڤا یازدە یا ئەڤسالە بهێتە ئەنجامدان.
جڤاتا وەزیران دووپات كر، پێدڤییە ئەڤ سەرژمێرییە ل سەر بنەمایێ بەرچاڤكرنا دادپەروەری و یەکسانییێ بیت و دویر بیت ژ هەر مەرەمەكا سیاسی و نەتەوەیی و پێشێلکاریی ل بنەمایێ دەستووری و ماددێ 140ـێ دەستووری تایبەت ب دەڤەرێن کوردستانێ و دەرڤەی ئیدارەیا هەرێمێ.
ل دووماهییێ جڤاتا وەزیران، وەزارەت و لایەنێن پەیوەندیدار ڕاسپاردن هاریكاری وەزارەتا پەروەردێ بن بۆ سەر ئێخستنا پڕۆسەیا ئەزموونێن پۆلا 12 ئامادەیی.
