ئامادەكاری بۆ هەڤشێوەكرنا لیستا مووچێ هەیڤا 7 یێ خانەنشینێن هەرێما كوردستانێ هاتینە تەمامكرن و دێ بۆ بەغدا هێتە ڕەوانەكرن.
لدویڤ زانیارییان، ڕێڤەبەرییا گشتی یا خانەنشینییێ نڤیسارەك بۆ وەزارەتا دارایی و ئابووری یا هەرێمێ هنارتییە و داخازكریە ڤێ هەیڤێ لیستا خانەنشینان ب گوهوڕین ڤە بۆ بەغدا بهێتە هنارتن.
یاسایا ژمارە 9 یا خانەنشینییێ بۆ دەمێ 10 سالایە ل عیراقێ كار پێ دهێتەكرن و بڕیارە ئەڤسالە بۆ خانەنشینێن هەرێما كوردستانێ ژی بهێتە بجهئینان و ب جێبەجێكرنا ڤێ یاسایێ مووچێ هەمی خانەنشینان دێ زێدەبیت.
ب جێبەجێكرنا یاسایا خانەنشینییا عیراقێ ل هەرێما كوردستانێ، 227 هزار و 541 خانەنشین دێ مفاداربن، نێزیكی 50 ملیار دینار ژی بۆ سەرجەمێ گشتی یێ مووچێ خانەنشینێن هەرێمێ دێ زێدە بیت.
