ڕێکخراوا شلۆمۆ بۆ دۆکیومێنتارییان د ڕاپۆرتەكێ دا ئاشكەراكر، پشتی داگیركارییا داعشێ ل نەینەوا، 75% یا كریستیانان ئەو باژێرە بجھـ هێلایە و ل دویڤ ئاماران ژمارا كریستیانان د دەمێ 30 سالان دا ژ 400 هزار كەسان بۆ 100 هزار كەسان كێمبوویە.
ڕێکخراوێ دیار ژی كریە، پشتی ئازادكرنا مویسل، ژمارەكا كێم یا ئاكنجییان ڤەگەڕیانە دەڤەرێن خۆ، ب ڕەنگەكی تا نوكە بتنێ 150 خێزانێن كریستیان ڤەگەڕیاینە.
ئەڤە د دەمەكی دایە كریستیانێن عیراقێ د دەمێن بووری دا تووشی چەندین نەهامەتی و ڤەگوهاستنا زورەملێ و گەفێن جوداجودا بووینە، د بیست سالێن بووری ژی دا ب فشارێن جیاواز یێن سیاسی هاتینە دەركرن و بەشەكێ وان بەرەڤ هەرێما كوردستانێ كۆچ كریە و بەشەكێ دی چووینە دەرڤەی وەلاتی.
د لێدوانەکێ دا بۆ مالپەرێ دەنگێ ئەمریکا نادین ماینزا، سەرۆکا ڕێکخراوا ئازادییا ئایینی یا نێڤدەولەتی ڕاگەهاند، کریستیانێن عیراقێ ل ژێر فشار و دڕندەییا میلیشیایان دا ب ڕەوشەكا ناهەمواردا دەرباز دبن.
