وەزیرێ ناڤخۆ یێ حکومەتا هەرێما کوردستانێ ڕاگەهاند، د چارچووڤێ بزاڤێن وان دا بۆ ڕێگریكرنێ ل تاوانێن ئەلكترۆنی، وان دەست ب سەر زێدەتری 20 هزار سیمكارتێن بێ مۆلەتدا گرتییە و ب دەهان جهێن فرۆتنا وان ژی داخستینە.
ڕێبەر ئەحمەد، وەزیرێ ناڤخۆ یێ حکومەتا هەرێمێ گۆت ژی: دامەزراوێن ئاسایشێ ب هەماهەنگی ل گەل وەزارەتا ناڤخۆ و پۆلیسان، دەست ب سەر زێدەتری 20 هزار سیمكارتێن بێ مۆلەت دا كو بۆ كارێن گەفێن ئەلكتیرۆنی دهاتنە بكارئینان و 110 کۆمپیوتەران كو بۆ گەفلێكرن و بێزاركرنا ئافرەتان هاتینە بكارئینان دا گرتیە و پڕ بوون ژ وێنە و ڤیدیۆیان كو ئافرەت پێ دهاتنە نەچاركرن، یان ژی ب پێچەوانە ئافرەتان ب پێ گەف ل زەلامان دكرن.
ئاشکەرا ژی کر، ” وان چەندین ئافرەت ژ کوشتنێ پاراستینە کو تووشی گەفێن ئەلكترۆنی بووینە و تاوانبار ڕویبڕوی دادگەهێ هاتینەكرن. “
وەزارەتا ناڤخۆ یا حکومەتا هەرێمێ د ئەڤسالە دا، کۆمپانی و بریکارێن فرۆتنا سیمکارتان ئاگەهداركرن سیمكارتێن خۆ ب شێوەیەكێ یاسایی بفرۆشن، ئەو بڕیارە ژی ل پێناڤی ڕێگرییێ ل خراب بكارئینانا ئامیرێن پەیوەندییێ و تاوانێن ئەلكترۆنی هاتە دەركرن.
