ل رۆژا سێشەمبی رێكەڤتی ١٠ـی ئیلونێ ٢٠٢٤ زانكۆیا دھۆك، ڤەكرنا سەنتەرێ خواندنێن فیدرالیزمێ راگەھاند، كو ب دەستكەڤتەكێ گرنگ دھێتە ھژمارتن، ژبەركو ئێكەم سەنتەرێ بسپۆرە ژ جۆرێ خۆ ل ھەرێما كوردستانا عیراقێ. د راگەھاندنێ دا، یاكو ل سەنتەرێ رەوشەنبیری و جڤاكی یێ زانكۆیا دھۆك ھاتیە ئەنجامدان، ھژمارەكا كەسایەتیێن تایبەت ئامادەببوون ژ وان، د. جەعفەر ئیبراھیم ئێمینكی، ئەندامێ مەكتەبا سیاسی یا پارتی دیموكراتی كوردستان و نوینەرێن سەرۆكاتیا ھەرێما كوردستانێ و پەرلەمانتار و یاساناس و مامۆستایێن زانكۆیێ.
د راگەھاندنێ دا، پەیڤەك ژ لایێ سەرۆكێ زانكۆیا دھۆك، د. داود سلێمان ئەتروشی ھاتە پێشكێشكرن، د پەیڤا خۆدا سەرۆكێ زانكۆیێ تەكەز ل سەر رۆلێ سەنتەرێ خواندنێن فیدرالیزمێ د پەرەپێدانا ڤەكۆلینا د بوارێ حوكمرانیا فیدرالی كر. دیسان ئاماژە ب ئەوێ چەندێ دا كو ھەبوونا سەنتەرێ خواندنێن فیدرالیزمێ یا فەرە بۆ تێگەھشتنا مە یا كویرتر بۆ فیدرالیەتێ ل عیراقێ و ھەرێما كوردستانێ، كو ئارمانجا سەنتەری پركرنا ڤالاھیێن مەزنە یێن د ڤەكۆلینێن ئەكادیمی دا د ئەڤی بواری دا ھەین، دیسان پشكداریێ دێ د جێبەجێكرنا كارا بۆ سیستەمێ فیدرالی كەت ھەروەكو د دەستورێ عیراقێ یێ سالا ٢٠٠٥ـێ دا ھاتی.
