وەزارەتا دارایی و ئابووری یا هەرێما کوردستانێ، ل دوور بابەتێ تەمویلا مووچەیێ فەرمانبەرێن هەرێما کوردستانێ ڕاگەهاندنەک بەڵاڤکریە و دیارکریە، “سەرەڕای بڕیارا دادگەها فیدڕالی و بزاڤێن وەزارەتا مە بۆ چارەسەرکرنا ئاریشەیان و ڕۆلی سەرۆکوەزیرێن هەرێما کوردستانێ کو ب ئەرکێ خۆ و زێدەتر ژی ژ وی ڕوویڤە ڕابوویە، بەلێ هێشتا ئاریشە د بەردەوامن و ئەم د بزڤێن چارەسەرکرنێداینە، سەرەڕای ڕەوشا هەستیار یا فەرمانبەران و مووچەخۆرێن هەرێما کوردستانێ کو بۆ دەمێ دوو مەهانە مووچە وەرنەگرتین ، ل ڤێرە و ل وێرێ هندەک داخویانی و ڕاگەهاندنێن نە بەرپرسانە ل سەر مووچەی دهێنە بەلاڤکرن، مە ب پێدڤی زانی چەند ڕاستیەکان بۆ ڕایا گشتی دیار بکەین.
١- ب درێژاهییا چەند مەهێن بووری تیمێن مە یێن تەکنیکی ب بەردەوامی دگەل وەزارەتا دارایی یا حکومەتا فیدڕال ل سەر هێل بوون بۆ چارەسەرکرنا ئاریشەیێن تەکنیکی یێن لیستا مووچەی، پشکا زۆر یا ئاریشەیێن هونەری یێن لیستا مووچەی هاتینە چارەسەرکرن و د نوکە دا تیمێن مە ل بەغدانە بۆ چارەسەرکرنا ڤەگۆهاستنا پارەی ژ مەزاختییێن هەرێمێ و ڕادەستکرنا لیستا مووچەی بۆ مەها کانوونا ئێکێ ب وەزارەتا دارایی یا عیراقێ.
٢- دەربارەی ڕاگەهاندنا بریکارێ وەزارەتا دارایی یا عیراقێ کو ئێڤاریا ئەڤرۆ ل سەر مووچەیێن هەرێمێ بەلاڤکریە، هەرچەندە جەنابێ وان د ئەرکێ خۆ دا یێ نوویە و چەند ڕۆژن دەستبکاربوویە، دێ ل هزرا وی ئینین کو ئەو پشکەکە ژ وەزاەرەتا دارایی یا عیراقێ، پێدڤی بوو ل وەزارەتا خۆ بزاڤێن چارەسەرییا ئەوان ئاریشەیان بکەت یێن کو بۆ مووچەیێن هەرێما کوردستانێ هاتینە دروستکرن و تا نوکە ژی د بەردەوامن، ئەو بابەتێن باسکرین د بنەکوکا خۆ دا ئاریشەیێن دەستکردن و سیاسینە کو کوەزارەتا دارایی یا عیراقێ دروستکریە، پێدڤییە ئەو بەرێزە مژیلی چارەسەرکرنا ئەوان ئاریشەیان بیت ل وەزارەتا خۆ نە کو وەک وەکیلێ مە باخڤیت، ئەوێن نوونەراتییا مە دکەن تیمێن مەنە کو نوکە ل بەغدانە نە جەنابێ وان یێن بەرێز، ئەوێن قەبارەیێ ئاریشەیێن مە چارەسەرکرین ل دەمێ بووری هەر تیمێن مە بووینە، ل ڕۆژا دەستبکاربوونا جەنابێ وان و تا نوکە مە گاڤەکا ئیجابی ژێ نە دیتیە، ئومێدەوارین ب ئەرکێ خۆ ڕاببیت، واتا کارێ خۆ ل وەزارەتا خۆ بجهبینیت، هەرێما کوردستانێ د دەسرتەکێ ئەمین دایە، هەمی ئەو بابەتێن جەنابی وی باسکرن مە ئاگەهــ ژێ نینە ، تیمێن مە بێ ئاگەهدارییا جەنابێ وی ل بەغدانە، ب چ ڕەنگەکی یا ڕێ پێدای نینە ب ناڤێ مە ئاخڤتن بهێتە کرن کو مە کەس نە کریە وەکیل، جەنابێ وی نوونەریەتییا عیراقێ دکەت نە یا هەرێمێ، پێدڤییە پشکەک بیت ژ چارەسەرییێن ئاریشەیان، ئەوا نوونەرایەتیا هەرێما کوردستانێ دکەت وەزارەتا داراییا هەرێمێ و حکومەتا هەرێمێ یە، لەورا هیڤیدارین جەنابێ وان ب ئەرکێ خۆ ڕاببن و دەستهەلاتا خۆ بزانن، نە کو بهێت و ل شوینا وەزارەتا مە باخڤیت، د ئەڤی دەمی دا، مە چاڤەڕێ دکر وەزارەتا جەنابێ وان سەرجەمێ تەموویلا مووچەیێ دوو مەهان هنارتبا نەکو بهێت و نووچەیێ مووچەی بەلاڤ بکەت کو ئەرکێ وی نینە.
٣- بۆ بریکارێ وەزارەتا دارایی یا عیراقێ و هەمی لایەکی دیار دکەین، کو هەر نووچەیەک و زانیاریەک و بابەتەکێ فەرمی تایبەت ب مووچەیڤە، ئەرک و تایبەتمەندیا وەزارەتا مەیە و هەر زانیاری و داتا و نووچەیەکێ مووچەی ل پێگەهێ فەرمی و پێگەهێن حکومەتا هەرێمێ نە بەلاڤ بیت، جهێ باوەریێ نینە و یێ ڕەتکریە، وەزارەتا دارایی یا هەرێما کوردستانێ بەرپرس و تاکە لایەنێ فەرمییە بۆ مامەلەکرنێ ل سەر دەم و شێوازێ دابەشکرنا مووچەی و هتد…
