ئەڤرو ل سلێمانیێ هەردوو شاندێن بلند یێن پارتی دیموکراتی کوردستان و ئێکەتی نیشتمانی کوردستان، دەربارەی پێکئینانا حکومەتا نوی یا هەرێما کوردستانێ کومبوون.
ئەڤرۆ مەحموود محەممەد، پەیڤدارێ پارتی دیموکراتی کوردستان، د لێدوانەکا روژنامەڤانی دا، گۆت: “د ڤێ کومبوونێ دا گەنگەشە دەربارەی هژمارەکا بابەتێن گرنگ دێ هێتە کرن. هەروەسا ئەو رەشنڤیس ژی دێ هێتە گەنگەشەکرن کو لیژنێن تەکنیکی یێن هەڤپشک یێن هەردوو لایان ل سەر رێککەفتین، دا کو بهێتە پەسەندکرن.”
مەحموود محەممەد ئاماژە ب وێ دا، ئەو چاڤەرێ دکەن کو ئەڤرۆ د کومبوونێ دا کومەلەك بریارێن گرنگ دێ هێنە دان.
پێکئینانا کابینا نوی یا حکومەتێ دێ چەند ڤەكێشیت؟ پەیڤداری پارتی د بەرسڤا ڤێ پرسیارێ دا گۆت: “ئەم چاڤەرێ دکەین کو د دەمەکێ نێزیک دا بیت.”
مەحموود محەممەد کو هەروەسا ئەندامێ مەکتەبا سیاسی یا پارتییە، باس ژ وێ ژی کر، د ماوێ بوری دا “کومەكا کومبوونێن گرنگ د ناڤبەرا هەردوو شاندێن تەکنیکی یێن پارتی و ئێکەتیێ داهاتینە کرن. ئەو بابەتێن تەکنیکی و سیاسی یێن دڤیا باس ژێ بهێتە کرن، باس ژێ هاتینە کرن و ل سەر پرانیا (بابەتان) رێککەڤتینە.”
