سەرۆك بارزانی: نەورۆز بۆ گەلێ كوردستانێ، بهار و نویبوون و ڕووناهی و ئازادییە

سەرۆك مەسعود بارزانی پەیامەك ب هەلكەڤتا جەژنا نەورۆزێ و سەرێ سالا كوردی بەلاڤكر و دیاركر، نەورۆز بۆ گەلێ كوردستانێ، بهار و نویبوون و ڕووناهی و ئازادییە، هەروەسا دپەیاما خۆدا، دووپاتی ل پێكڤەژیانێ و پەیاما ئاشتیخوازانە كر.
دەقێ پەیاما سەرۆك بارزانی:
ب ناڤێ خۆدایێ مەزن و دلوڤان
نەورۆز بۆ گەلێ كوردستانێ، بهار و نویبوون و ڕووناهی و ئازادییە، نەورۆز ڕامانا ژیانەكا نوو و مزگینییا سەركەڤتنا ڕووناهییێ ل سەر تاریاتییێ و زۆلمێ د دەت، ب هەلكەڤتا هاتنا جەژنا نەتەوەیی یا نەورۆزێ پیرۆزباهییێ ل خێزانێن سەربلندێن شەهیدان و پێشمەرگەیێن قارەمان و هەموو تەخ و چینێن خەلكێ كوردستانێ دكەم، نەورۆزێ ل هەموو گەنجێن گەلێ كورد ل پارچەیێن دییێن كوردستانێ پیرۆز دكەم، پیرۆزباهییێ ل هەموو وان نەتەوەیان دكەم یێن نەورۆز بوویە پشكەك ژ مێژوو كولتوور و دابونەریتێن وان.
ل ڤێرێ من دڤێت ب گەرمی پیرۆزباهییێ ل ڕەڤەندا كوردی و وان ملیۆنان كوردان بكەم، یێن ب هەستەكێ بلند و دوور ژ ئاخا نیشتیمانی جەژنا نەورۆێ بلند ڕادگرن، بهایێن نەورۆێ ل هەموو جیهانێ بەلاڤ دكەن، د بێژمە وان هوین هەردەم د هزر و وژدانا مەدانە و خۆشی و جەژنێن هەوە درێژەپێدەرێن خۆشی و جەژنێن مەنە، جهێ شانازییێ یە كو دبینین دەست دناڤ دەستاندا و ب ئێك دلی ل نەورۆێ ئالایێ ئازادییێ بلند دكەن.
گەلەك یێ كەیفخۆشم ل باژێرێ ( كۆلن )یێ ئەلمانیا د ڕێورەسمەكێ مەزندا حەز ژێكرن و سۆزا خۆ بۆ وەلاتێ خۆ دووپات دكەن، هوین دەنگ و ڕەنگێن گەلێ خۆنە و دەستخۆشییێ ل وە دكەم.
ل جەژنا نەتەوەییا نەورۆزێ ب شانازیڤە دووپاتییێ ل فەرهەنگا پێكڤەژیانێ و پەیاما ئاشتیخوازانە یا گەلێ كوردستانێ دكەین، هەر دوی چارچووڤەیدا پشتەڤانییا پرۆسەیا ئاشتییێ و چارەسەرییێ ل توركیا دكەین، ئاشتییێ ب تاكە ڕێیا ڕاست و دروست یا دەربازكرنا ئاریشەیان دزانین، هەر دڤێ هەلكەڤتێدا ب هیڤییا ب دووماهی ئینانا ئێش و ئازارێن گەلێ كورد ل سووریا بیت، كورد ب هەلویستەكێ هەڤپشك و ڕێكارێن ئاشتیانە دگەل لایەنێن دی یێن سووریا بگەهنە ئەنجامەكی كو د خزمەتا هەموو لایەكیدا بیت.
هیڤیدارم نەورۆزا ئەڤسالە ببیتە دەستپێكەك بۆ ئارامی و خۆشییێ بۆ هەموو خەلكێ كوردستانێ و عیراقێ، ئەڤێ نەورۆزێ و هەموو جەژنان د بەختەوەرییێدا بكەن، هیڤیخوازم گەلێن دەڤەرێ بشێن ل ژێر سیبەرا ئارامی و سەقامگێرییێ دسەقایەكێ ئاشتیانە و برایانەدا بژین.
مەسعود بارزانی
30ی ڕەشەمێ 2724ێ كوردی
20ی ئادارا 2025ێ زایینی