وه‌زاره‌تا چاندنێ: مە بەرنامە بۆ بەرهنگاربوونا هشکە سالییێ دانایە

وه‌زاره‌تا چاندنا حكومەتا هەرێمێ دیار كر: ل‌ هندەك دەڤەرێن هه‌رێما كوردستانێ هشكه‌ سالییە، مە پلان بۆ سه‌رۆكاتییا جڤاتا وەزیران ب مەرەما بەرهنگاربوونا هشكه ‌سالییێ و گوهۆرینا سەقایی هنارتییە.

هیوا عه‌لی پەیڤدارێ وەزارەتا چاندنا هەرێمێ، دبێژیت ژی: هشكە سالی لدووڤ تایبه‌تمه‌ندییا جهانە‌، كێمیا بارانێ و داكەفتنا ئاستێ ئاڤێ كاریگه‌ری كرییه‌ سه‌ر كه‌رتێ چاندنێ، ڕاسته‌ ئەڤ سالە ل هه‌رێما كوردستانێ بارانێن پێدڤی نه‌بارینە، به‌لێ دشێین بێژین نیڤ‌ هشكه ‌سالییه‌، چونكی هەر دەڤەرەكێ تایبه‌تمه‌ندییا خۆ هه‌یه‌، بۆ نموونه‌ دبیت ل‌ هه‌ولێرێ هشكه‌ سالی بیت، ل‌ دهۆكێ ڕه‌وش یا جوداتر بیت‌، ل‌ سلێمانییێ، هه‌له‌بجه‌ و گه‌رمیان جۆرەكێ دیترە، هه‌ر باژێرەكی تایبه‌تمه‌ندییا خۆ هه‌یه‌، ئاستێ داكەفتنا ئاڤێ و به‌رهه‌مێ چاندنێ ل‌ هه‌موو جهان وه‌كو ئێك نینە.

ناڤهاتی گۆت ژی: نەشێین بێژین هشكه‌ ساڵی سه‌رانسه‌رییه‌، هەر چەندە كاریگه‌رییا كێمیا بارانێ زۆرتره‌ ل ‌سه‌ر هندەك دەڤەران، ل وان دەڤەران هشكه‌ ساڵییه‌، ب ‌تایبه‌تی ڕێژا هشكه‌ سالییێ پترە ل‌ هه‌ردو پارێزگەهێن هه‌ولێر و دهۆكێ.

هیوا عه‌لی دبێژیت ژی: ب‌ به‌رده‌وامی پلانا به‌رهنگاربوونا هشكه ‌سالییێ و گۆهەرینێن سەقایی هه‌نه‌، وه‌زاره‌تا چاندنێ پلانا خۆ پێشكێشی سه‌رۆكاتییا جڤاتا وه‌زیران كرییه‌، ئێك ژ واننا پشتەڤانیا داراییە بۆ وه‌زاره‌تا چاندنێ، هه‌روه‌سا زێدەكرنا خەزنكرنا ئاڤێ ل هه‌رێما كوردستانێ، ب رێیا زێدەكرنا هژمارا به‌نداڤ و پۆندان، هەروەسا‌ ڤەگوهاستنا ئاڤێ ژ كەنالێن ئاڤدێرییێ بۆ جۆتیاران.