سوبەهی جڤاتا وەزیران دێ ل دۆر مووچەی كۆمبیت

سوبەهی جڤاتا وەزیرێن هەرێما كوردستانێ دێ كۆمبیت و بابەتێ مووچەی گۆتوبێژكەت، بریارە پشتی كۆمبوونێ مەسرور بارزانی هەلویستێ حكومەتێ ل دۆر مووچەی دیاربكەت.
ل دووڤ كارنامەیا جڤاتا وەزیران، سوبەهی چارشەمبی 25/6/2025ێ جڤاتا وەزیران دێ كۆمبیت، كۆمبوون دێ ل دەمژمێر 10:00ی سپێدێ دەستپێكەن و 12:00ی نیڤرۆ ب دووماهی هێت، پشتی كۆمبوونێ مەسرور بارزانی سەرۆكوەزیرێن هەرێما كوردستانێ، دێ د پرێسكۆنفرانسەكیدا هەلویستێ حكومەتێ ل دۆر ئاریشەیێن مووچەی و چارەسەركرنا وان ڕاگەهینیت.
دبرگەیا دووێ یا كۆمبوونێدا، ڕەوشا داراییا هەرێما كوردستانێ ب تایبەتی بابەتێ مووچەیێ مووچەخۆران دێ هێتە هەلسەنگاندن، كو دەمێ دوو هەیڤایە ب بریارەكا نەدەستوورییا وەزارەتا داراییا فیدرال، خەرجكرنا شایستەیێن داراییێن هەرێمێ هاتینە ڕاگرتن.
حكومەتا هەرێمێ دیاركر، وەزیرێ دارایی و ئابووری دێ ڕاپۆرتەكێ پێشكێشكەت، كو داهات و خەرجییێن نوكە یێن هەرێما كوردستانێ تێدانە، ڕیێن چارەسەركرنێ ژی دێ هێنە دەستنیشانكرن.
هەروەسا ڕاپۆرتا وەزارەتا كار و كاروبارێن جڤاكی ل دۆر خانەنشینییێ و دەستەبەرا جڤاكییا كرێكاران دێ هێتە خواندن.