ئەڤرۆ چارشەمبی، 23-07-2025 ێ، جڤاتا وەزیرێن هەرێما کوردستانێ ب سەرپەرشتییا مەسرور بارزانی، سەرۆکوەزیران کۆمبوو و راگەهاند، “هەرێما کوردستانێ هەموو پابەندییێن خۆ د چارچوڤێ رێککەفتنا نوو ل گەل حکومەتا فیدرالی بجهئیناینە، بەلێ بەغدا هەتا نوكە موچەیێ سێ هەیڤان نەهنارتییە.”
د راگەهاندنا حکومەتێدا هاتییە، جڤاتا وەزیران تەكەزكرییە” كو دبیاڤێ داهاتێ نە نەفتیدا، وەزارەتا داراییا هەرێما کوردستانێ 120 ملیار دینار ب کاش خستینە سەر هژمارا بانکییا وەزارەتا داراییا فیدراڵی. هەروەسا لیستا موچەیێ هەیڤێن گولان و خزیرانێ ب هووربینیکری رەوانە کرینە و هەموو داتا و داهات و خەرجی ب شێوەكێ شەفاف خستینە هەمبەری تیمێن چاڤدێرییا دارایی.”
گۆت ژی “وەزارەتا سامانێن سروشتی هەموو ئاسانکاری بۆ لژنا وەزارەتا نەفتا فیدراڵی و کۆمپانیا سۆمۆ کرینە و هەردو ئالی گەهشتینە لێکتێگەهشتنەكا هەڤپشك ل سەر پڕۆتۆکۆلا دەستپێکرنا هنارتنا نەفتێ و جڤاتا وەزیران هۆکارێ کێمبوونا بەرهەمێ نەفتێ ژی ڤەگەڕاندییە بۆ هێرشێن درۆنی یێن تیرۆریستان بۆ سەر کێڵگەهێن نەفتێ.
جڤاتا وەزیران داخواز ژ حکومەتا فیدراڵی کر ” هەر زوو” موچە و شایستێن دارایی یێن خەڵکێ کوردستانێ بهنێریت و راگەهاند: “موچەخۆرێن هەرێمێ، سێ هەیڤە هاتینە بێ بەهركرن ژ شایستێن خۆ یێن دارایی، کو مافەكێ دەستووری و یاسایی یێ وانە و نابیت ل ژێر چ بەهانەكێ ئەو مافە بهێنە بنپێكرن.
جڤاتا وەزیران رێککەفتنناما دناڤبەرا هەردو حکومەتێن هەرێما کوردستانێ و فیدراڵی سەبارەت دانانا میکانیزما هەماهەنگی د بیاڤێ کۆنتڕۆلا جۆری پەسەند کر” لدووڤ وێ رێککەفتنێ، باوەرنامێن پشکنینا کەلوپەلان ژ لایێ هەردو دامەزراوەیێن پیڤانەسازی و کۆنتڕۆلا جۆرییا هەرێما کوردستانێ و فیدراڵی کار پێ دهێتە كرن و رێکارێن وان دێ بنە ئێك.
ڤێ بڕیارێ دێ “رۆلەكێ گرنگ هەبیت د ئاسانکارییا بزاڤا بازرگانی و دووماهی ئینان ب وان ئاستەنگێن رووبڕوو بازرگان و هاوردەکاران دناڤبەرا هەرێما کوردستانێ و عێراقێ دبن.
جڤاتا وەزیران زێدەباری دەستخۆشییێ ل خۆڕاگرییا خەڵکێ کوردستانێ، داخواز ژ دەزگەهێن راگەهاندنێ کر ب شێوەكێ “بەرپرسانە” کار بکەن و نەبنە سەکۆیەک بۆ بەلاڤكرنا “زانیاریێن نەڕاست و چەواشەکاری”.
حکومەتا هەرێمێ: مە پابەندییێن خۆ بجهئیناینە و لیستا موچەیی یا پەسەندکری یێن هەیڤێن گولانێ و خزیرانێ رەوانەكرینە
