نێچیرڤان بارزانی ل گەل سیناتۆرەكا ئەمریکی کۆمبوو

 

ئه‌ڤرۆ ئێكشه‌مبی‌ 2025/8/24 نێچيرڤان بارزانى، سه‌رۆكێ هه‌رێما كوردستانێ، پێشوازی ل‌ سيناتۆرێ كۆماري یێ ئه‌مريكى خانم جۆنى ئێرنست، ئه‌نداما كۆميتا هێزێن چه‌كدار ل‌ جڤاتا پيرێن ئه‌مريكا كرد.
د وێ‌ كۆمبوونێدا، پشتەڤانیا ئه‌مريكا بۆ پاراستنا ئارامى و سه‌قامگيريیا عێراقێ، رەوشا ئه‌منيا عێراقێ و هه‌رێما كوردستانێ، گەف‌ و مه‌ترسييێن داعشێ ل‌ عێراق و سووريێ و داوی پێشهاتێن ڕۆژهه‌لاتا ناڤین و لێكه‌فتێن وێ ل سەر دەڤەرێ هاتنە بەحسكرن.
هه‌ردو ئالییان تەكەزی ل سەر گرنگيیا هاریكارییا هەڤپشك یا ئه‌مريكا و عێراقێ بۆ هه‌رێما كوردستانێ كر بۆ پاراستنا ئارامى و سه‌قامگيريیا وەلاتی و به‌رهنگاربوونا بزاڤ‌ و هێرشێن ڕێكخراوا تيرۆرستيىا داعشێ كو هێشتا مه‌ترسييه‌كا ڕاسته‌قينه‌يه‌‌ بۆ ئاسايش و سه‌قامگيريا عێراق و سووريێ.
نێچيرڤان بارزانى سوپاس و پێزانينێن خۆ بۆ ئه‌مريكا دوپاتكرن‌ بۆ ئه‌وان هاریكارييێن بۆ به‌رهنگاربوونا گەف‌ و مه‌ترسييێن تيرۆرێ، پێشكێشی‌ عێراقێ و هه‌رێما كوردستانێ دكەت.
خانم ئێرنستێ تەكەزی لسەر‌ پابه‌ندی و به‌رده‌واميیا پشتەڤانیا ئه‌مريكا بۆ عێراق و هه‌رێما كوردستانێ كر، هه‌روه‌سا ئارامى و سه‌قامگيريیا ناڤخۆ و ته‌ڤايى و ئێكڕێزيیا هێز و لايه‌نێن‌‌ سياسيێن هه‌رێما كوردستانێ ب‌ گرنگ ل‌ قه‌له‌م دا.