پەیڤدارێ حكومەتا هەرێمێ دەربارەیی بابەتێ موچەیی و نەفتێ راگەهاندنەك بەلاڤكر

پێشەوا هەورامانی، پەیڤدارێ حكومەتا هەرێما کوردستانێ، چەند بەرچاڤ رۆنییەک دەربارەیی بابەتێ موچەیی و نەفتێ بەلاڤكرن.
د کۆمبونا دوهی یا جڤاتا وەزیرێن عێراقێ ٤۸ دەمژمێر دانە وەزیرێ نەفتا عێراقێ بۆ هندێ بابەتێ هنارتنا نەفتا هەرێما کوردستانێ بهێتە چارەسەر کرن.
کۆمپانیێن بیاڤێ بەرهەمئینانا نەفتێ ڕازیبوون ب هندێ كو لدووڤ یاسایێن عێراقێ مامەلە ل گەل وان بهێتە كرن و دەستبەرداری ئەوان بابەتان بوون کو ب یاسایێن بیانی مافێ ئەوان بهێتە پاراستن.
حکومەتا هەرێما کوردستانێ نڤیسارا فەرمی كریە کو بەشە نەفتا خۆ ڕادەستی سۆمۆ بکەت.
پێدڤییە ل گەل ڕادەستکرنا نەفتێ موچەیێ هەیڤا ۷ و هەیڤێن دووڤدا یێن موچەخۆرێن هەرێما کوردستانێ بهێتە هنارتن.
د ئەسلێ بابەتی دا، چ ژ وان رێكاران د پێدڤی نەبوون، چ هۆکار نینن بۆ نە هنارتنا موچەیێ هەرێما کوردستانێ و ب تنێ یاسایێن بودجەیی و یاسایێن کارگێڕییا دارایی و دەستوری ببنە دادوەر” ئێك هۆکار ژی نامینیت بۆ خەرجکرنا موچەیی ل پال بڕیارا دادگەها فیدراڵی، حکومەتا هەرێما کوردستانێ هەموو داخوازی و ئەرکێن ل سەر ملێن خۆ بجهئیناینە و نە هنارتنا موچەیی بێ موبەررە.
نوكە شیانێن بەرهەمهئینانا نەفتێ بەرەف ئاسایبوونێ ڤە چووینە و ڕۆژانە ۲۳۳ هزار بەرمیلێن نەفتێ دهێنە بەرهەمئینان، دەستپێکرنا هنارتنا نەفتێ دێ د خزمەتا رەوشا داراییا عێراقێ و هەرێما کوردستانێ دابیت.
هەموو بزاڤێن حکومەتا هەرێمێ و بجهئینانا داخوازییێن حکومەتا فیدرالی ژ پێخەمەتی هندێیە كو چ موچەیێن موچەخۆرێن هەرێمێ نەفەوتن.
د بابەتێ داهاتێ ناڤخۆ دا” یاسایی چ بۆ مە دیاریکرییە” ئەم پێڤە پابەندین بێ زێدە و کێم.