شاندەكێ وەزارەتا ئەوقافێ بۆ بەرهەڤییێن حەجێ دێ سەرەدانا سعوودیێ كەت

شاندەكێ وەزارەتا ئەوقافێ و کاروبارێن ئایینی یێ حکومەتا هەرێما کوردستانێ دێ سەرەدانا وەلاتێ سعوودیێ كەت.

کاروان ستوونی، پەیڤدارێ دەستەیا حەج و عومرێ ل هەرێما کوردستانێ دیار كر: ئەڤ سەرەدانە لسەر ڕاسپاردا حکومەتێ و وەزارەتا ئەوقافێ دێ هێتە ئەنجام دان؛ ئەو شاندە ب هەڤپشكی ل گەل نوونەراتییا گشتییا حەج و عومرێیە ل دەستەیا بلندا حەج و عومرا عێراقێیە، دێ دووڤچوونێ بۆ جهێ مانا حەجییان و پشکنینا خوارنێ کەن و ئەو گەشتە دێ چەند ڕۆژان ڤەكێشیت و ئارمانج ژێ لێکۆلینە ل هوورکارییێن بەرهەڤییێن وەرزێ حەجا سالا بهێت.

ناڤهاتی گۆت ژی: د وەرزێ ئەڤ سالە دا، فەرمانگەها تەکنەلۆجیا زانیارییان ل حکومەتا هەرێما کوردستانێ، سیستەمەكێ پێشکەفتی یێ ئەلکترۆنی بۆ ناڤ نڤێسینا حەج و عومرەکارێن کوردستانێ ئێخستە كار”

هەروەسا سەرۆکوەزیران مەسرور بارزانی و وەزارەتا ئەوقافێ هەردەم داخوازا باشترین خزمەتگوزارییان بۆ حەجییان دکەن” دیسا ئەڤە دەمێ سێ سالایە شاندێ عێراقێ، كو هەرێما کوردستانێ پشکا شێری تێدا هەیە، خەڵاتێ “لەبەیتوم” وەک باشترین شاند ل سەر ئاستێ وەلاتێن ئیسلامی بدەستڤە ئینایە و دەستەیا بلندا حەج و عومرا عێراقێ ب نڤیسارا فەرمی سوپاسییا شاندێ هەرێما کوردستانێ کرییە.

كاروان ستوونی گۆت ژی: ئەڤە چەند سالە حکومەتا عێراقێ داخوازا زێدەکرنا پشکا حەجییان کرییە، بەلێ هەتا نوكە وەزارەتا حەج و عومرا سعوودییە” چ بریار دەربارەیی ڤی بابەتی نەداینە” وەلاتێ سعوودی سالانە لدووڤ ڕێژا ئاكنجییا وەلاتان و لدووڤ وی بنەمایی بۆ هەر ملیۆنەک کەسان هزار کەسان، بۆ حەجێ دیار دكەت” پشکا هەرێما کوردستانێ د نوكە دا پێنج هزار و 135 كەسن” ل گەل هندێ ئاسانکارییێن حکومەتا هەرێما کوردستانێ د کابینا نەهێ دا بوویە ئەگەرێ دامەزراندنا نێزیکی 300 کۆمپانیێن نوو یێن حەج و عومرێ” هەروەسا نوكە 242 کۆمپانیان گرێبەست بۆ وەرزێ عومرا ئەڤ سالە ئیمزا كرینە.