دو کۆلیژێن نوو ل زانکۆیا ئاکرێ دێ هێنە ڤەكرن

هەردو کۆلیژێن زانستا ئەندازیارییا چاندنێ و یاسا بۆ جارا ئێكێ ل زانکۆیا ئاکرێ بۆ زانستێن كرداری دێ هێنە ڤەكرن و ب ڤی رەنگی ئەو زانکۆیە دێ بیتە خودانا پێنج کۆلیژان.

د. لوقمان سەعید، پەیڤدارێ زانکۆیا ئاکرێ بۆ زانستێن کرداری، دیار كر:هەردو کۆلیژێن نوو یا یاسایێ و زانستا ئەندازیارییا چاندنێ، بۆ سالا نوو یا خواندنێ 2025-2026 ێ، ل زانکۆیا مە دێ هێتە ڤەكرن و ئەڤە پشتی وەرگرتنا ڕەزامەندییا وەزارەتا خواندنا بلند و ڤەكۆلینێن زانستی یا حکومەتا هەرێما کوردستانێ.

ناڤهاتی گۆت ژی: کۆلیژا زانستا ئەندازیارییا چاندنێ ل قەزا بەردەڕەش دێ هێتە ڤەکرن و ژ سێ بەشێن سەرەکی پێكدهێت: سامانێن ئاژەلی، زانست و تەکنەلۆژیا خوارنێ، و ڕەزگەری” هەروەسا ڤێ کۆلیژێ خواستەكا زۆر ل سەر هەیە، چونکی دەڤەرەكە ب چاندنێ دهێتە نیاسین” دیسان ڤەکرنا کۆلیژا یاسایێ دێ ل ناڤەندا باژێرێ ئاکرێ بیت، ئەڤە دێ کارئاسانییەکا مەزن بۆ خەلكێ ڤێ دەڤەرێ كەت و ئێدی پێدڤی ناکەت بۆ خواندنا یاسایێ بچنە دەرڤەیی ڤی باژێری بخوینن.”

ئەو چەند ژی گۆت: هژمارا کۆلیژ و پەیمانگەهێن زانکۆیا ئاکرێ ب ڤی رەنگییە: کۆلیژا پەروە ردێ” کۆلێژی تەکنیکی” کۆلیژا یاسا ( یا نوو)”    کۆلیژا زانستیا ئەندازیارییا چاندنێ ( یا نوو)” کۆلیژا ئینفۆرماتیک” پەیمانگەها تەکنیکییا ئاکرێ” پەیمانگەها تەکنیکییا بەردەرەش” هەروەسا زانکۆیا مە ئامادەکارییێن زۆر باش بۆ سالا نوو یا خواندنێ کرییە و بۆ ئەڤ سالە شیانێن وەرگرتنا هزار و 650  قوتابییان هەیە.

ژ هەژی گۆتنێ یە” زانکۆیا ئاکرێ دو سالان بەری نوكە ب بریارەكا ڕاستەوخۆ یا سەرۆکوەزیران، مەسرور بارزانی، هاتییە دامەزراندن.