پێشەوا هەورامانی بۆ حەلبووسی: هەولێر پێشوازییێ ل شۆفینییەكێ وەكی تە ناكەت

پێشەوا هەورامانی پەیڤدارێ حكومەتا هەرێما كوردستانێ بەرسڤەكا تووند دا محەمەد حەلبووسی سەرۆكێ حزبا تەقەدوم و ڕاگەهاند، هەولێر پێشوازییێ ل كەسەكێ شۆفینییێ وەكی حەلبووسی ناكەت.
پێشتر حەلبووسی ڕاگەهاندبوو، ئەو ب چ شێوەیان سەرەدانا هەولێرێ ناكەت داكو پۆستێ سەرۆكێ پەرلەمانی وەربگریت، ئەگەر خۆ ل سەر ژیانا وی ڕاوەستیابیت.
پێشەوا هەورامانی پەیڤدارێ حكومەتا هەرێما كوردستانێ د بەرسڤەكێدا بۆ وی ل سەر ئەكاونتێ خۆ یێ ئێكس دیاركر، هەولێر پێشوازییێ ل تە ناكەت، هەولێر جهێ وان كەسان نینە یێن قەنجییان ژبیر دكەن، تو نوونەرایەتییا هزرا شۆفینی دكەی.
هەروەسا ئاشكراكر، دڤێت حەلبووسی بەرامبەر دادگەهێ ب ڕاوەستیت بۆ وان ملیۆنان دۆلارێن ب گەندەلییێ وەرگرتین، مانا كەسێن وەكو وی ب مخابنیڤە دووپات دكەت كو هزرا شۆفینی ل عیراقێ هێشتا نەهاتییە بنبڕكرن.
ئاماژە ب هندێ دا، دڤێت ئەو بۆخۆ وانەیان ژ مێژوویێ وەربگریت، هەرێما كوردستانێ بەرهەمێ خوینەكا مەزنە، حەلبووسی ژ هندێ كێمترە سنووران بۆ ئیرادەیا وێ بدانیت.