مەسرور بارزانی، سەرۆکوەزیرێن هەرێما کوردستانێ د پەیامەکێ دا ب هەلکەفتا جەژنا نەورۆزێ و سەری سالا نووی یا کوردی، پیرۆزباهییێ ل هەمی کوردستانیان دکەت و دبێژیت: “خەلکێ کوردستانێ پشتڕاست دکەین کو دێ هەمی شیانێن خۆ ئێخینە بەر بۆ پاراستنا کوردستانێ و دویرئێخستنا وێ ژ هەر مەترسیەکێ”.
دەقێ پەیامێ:
ب هەلکەفتا هاتنا جەژنا نەورۆزێ و سەری سالا نووی یا کوردی 2726ـی، گەرمترین پیرۆزباهیان ئاراستەیی گشت کوردستانیان دکەم، ب تایبەتی پێشمەرگەیێن قارەمان و هێزێن ئاسایشا ناڤخۆ و کەسوکار و مالبانێن سەربەرزێن شەهیدان و ئەنفالکریان، و هیڤیا شادی و ساخلەمیێ بۆ وان دخوزم.
جەژنا نەورۆزێ بۆ گەلێ کوردستانێ، نیشانەیە بۆ سەرکەفتن و ئازادیێ و بەرهنگاربوونا زۆرداران و هاتنا بهارێ و دەسپێکرنا ژیانەکا نووی، هیڤیدارم ئەڤ نەورۆزە ببیتە دەسپێکا قۆناغەکا تژی ئاشتی و تەناهی د ژیانا خەلکێ کوردستانێ دا، و دوماهی هاتنا شەڕ و ناخۆشیان ل دەڤەرێ و جیهانێ ب گشتی.
سوپاسیا خۆڕاگريیا خەلکێ کوردستانێ دکەم کو مخابن، ژبەر هێرشێن نەڕەوا یێن تیرۆریستی یێن هێز و میلیشیایێن ژ یاسایێ دەرکەفتی، هەرێما کوردستانێ و ژیانا وەلاتیان بەرەڤ ڕەوشەكا نەخواسن برییە.
ل ڤێرە خەلکێ کوردستانێ پشتڕاست دکەین کو دێ هەموو شیانێن خۆ ئێخینە بەر بۆ پاراستنا کوردستانێ و دویرئێخستنا وێ ژ هەر مەترسیەکێ.
سوپاسیا هێزێن ئاسایشا ناڤخۆ و هێزێن هەڤپەیمانان و لایەنێن پەیوەندیدار و فەرمانگەهێن خزمەتگوزاری یێن حکومەتا هەرێما کوردستانێ دکەین بۆ بزاڤ و ماندیبوونا وان و بجهئینانا ئەرکێن وان ب کارامەیی و لێهاتوویی.
هیڤیدارم ئەڤ رەوشا سەخت د پاشەڕۆژەکا نێزیک دا ب دوماهی بهێت و هەرێما کوردستانێ وەک هەر دەم یا بەردەوام بیت د پێشکەفتن و گەشەپێدان و ئاڤادانیێ دا.
جەژنا نەورۆزێ ل وە هەمیان پیرۆز بیت و هەر د خۆشی و تەبایی و تەناهیێ دا بژین.
