بنگه‌هێ لالش: ئەگەر قانوونەك هەبا، یێن وەكو سەنەدی نەدوێریان سڤكاتییێ ئازارێن ئێزدییان بكەن

بنگه‌هێ لالش ل دهۆكێ، د بەیاننامەیەكێدا داخویانیيێن مسته‌فا سه‌نه‌د ب دژى ئێزدييان ب توندی شه‌رمزار كرن و ڕاگه‌هاند، ئه‌گه‌ر ياسايه‌ك هه‌با، سه‌نه‌د و هنده‌ك كه‌س نه‌دوێريان سفكاتييێ ب ئێش و برینێن جینۆسایدا ب سه‌رێ ئێزدیيان هاتى بكه‌ن.
بنگه‌هێ لالش دبه‌ياننامه‌يا خۆدا دووپاتكر، پێدڤييه‌ مه‌رجه‌عێن ئۆلى و سیاسی یێن نیشتيمانی و به‌رپرس ڕۆلێ خۆ بگێڕن بۆ فشارێ ل سه‌ر جڤاتا نوونه‌رێن عێراقێ دا كو ب زووترین ده‌م ياسايه‌كا زه‌لال و توند بۆ چاره‌سه‌ركرنا دیاردا گۆتارێن كه‌رب و كینێ په‌سه‌ند بكه‌ت.
ده‌قێ به‌ياننامه‌يا بنگه‌هێ لالش:
بنگه‌هێ لالش یێ ڕه‌وشه‌نبیری و جڤاكی هه‌رده‌م داخوازا ده‌ركرنا ياسايه‌كا توند كرییه‌ كو سنووره‌كی بۆ وان ئاخفتن و گۆتارێن كه‌رب و كینێ بدانێت یێن كو پێكهاته‌یێن ئۆلى یان نه‌ته‌وه‌یی ل عێراقێ دكه‌نه‌ ئارمانج.
ئه‌گه‌ر ياسايه‌كا ب ڤی ڕه‌نگی یا كارا هەبا، هنده‌ك كه‌س و ژ وان ژی ئه‌ندامێ جڤاتا نوونه‌رێن عێراقێ مسته‌فا سه‌نه‌د و یێن به‌ری وی ژی، نه‌دوێريان سفكاتييێ ب ئێش و برینێن جینۆسایدا ب سه‌رێ ئێزدیيان هاتى بكه‌ن.
د ده‌مه‌كیدا كو ئه‌م ب توندی ڤان داخویانیێن نه‌جوان و خراب یێن وی په‌رله‌مانتاری شه‌رمزار دكه‌ین، ئه‌م دووپات دكه‌ین ئه‌ڤ كریاره‌ نه‌بتنێ برینداركرنا هه‌ستێن قوربانییان و كه‌سوكارێن وانه‌، به‌لكو ئه‌ڤه‌ بنه‌مایێن پێكڤه‌ژیانێ و ئاشتییا جڤاكی ل وه‌لاتی ژناڤ دبه‌ت.
له‌ورا، ئه‌م داخوازێ ژ مه‌رجه‌عێن ئۆلى و سیاسی یێن نیشتيمانی و به‌رپرس دكه‌ین كو ڕۆلێ خۆ بگێڕن بۆ فشارێ ل سه‌ر جڤاتا نوونه‌رێن عێراقێ دا كو ب زووترین ده‌م ياسايه‌كا زه‌لال و توند بۆ چاره‌سه‌ركرنا دیاردا گۆتارێن كه‌رب و كینێ په‌سه‌ند بكه‌ت، كار بۆ نه‌هێلانا ڕه‌هـ و ڕيشالێن ڤێ دیاردێ ژناڤ جڤاكی بكه‌ت، ب ڤێ چه‌ندێ دێ كو‌لتوورێ هه‌ڤوه‌لاتیبوونێ چه‌سپينیت و بهایێن ڕێزگرتنا هه‌ڤدو و شانازیكرن ب وه‌لاته‌كی كو جهێ هه‌موو خه‌لكێ وی تێدا بت، دێ بێهێزتر لێ ئێن.
ده‌سته‌يا بلندا بنگه‌هێ لالش يێ ڕه‌وشه‌نبيرى و جڤاكی ل دهۆكێ
2/4/2026