پەیاما سەرۆک بارزانی ب هەلکەفتا جەژنا قوربانێ یا پیرۆز

سەرۆک مەسعود بارزانی ب هەلكەفتا هاتنا جەژنا قوربانی پەیامەك بەلاڤكر و تێدا هاتییە:
ب ناڤێ خودایێ مەزن و دلۆڤان
ب هەلکەفتا هاتنا جەژنا قوربانی یا پیرۆز، گەرمترین پیرۆزباهیێن خۆ ئاراستەیی موسلمانێن کوردستانێ، عیراقێ و هەموو جیهانێ دکەم. پیرۆزباهیەکا تایبەت ژی ئاراستەیی مالباتێن سەربلندێن شەهیدان، پێشمەرگەیێن قەهرەمان و هەموو وەلاتیێن خۆشتڤی یێن کوردستانێ دکەم. د ڤێ هەلکەفتا پیرۆز دا ژ خودایێ مەزن دخوازم خێر، خۆشی و ئارامیێ بدەتە هەموو خەلکێ کوردستانێ و جیهانێ.
هەروەسا د ڤی دەمێ هەستیار و چارەنڤیسساز دا، پەیاما من بۆ لایەن و هێزێن سیاسی یێن کوردستانێ ئەوە کو هەموو لایەک هزر ل بەرژەوەندیێن خەلکێ کوردستانێ بکەنەڤە و بەرژەوەندیێن بلندێن گەلێ مە د سەر ئارمانج و بەرژەوەندیێن بەرتەنگ ڕا بدانن، دەست ژ ڤان ململانێیێن بێ ئەنجام و وێ خۆخۆریێ بەردەن یاکو دەمەكە پرۆسا سیاسی یا هەرێمێ پێ دنالینیت، داخواز دکەم پشتی جەژنا قوربانی یا پیرۆز، لایەنێن سیاسی یێن هەرێمێ ب دلسۆزی و هەستێ نیشتیمانپەروەرییێ ڤە پێکڤە کۆمببن و ڤێ چەقبەستییا سیاسی چارەسەر بکەن و دووماهییێ ب ڤێ رەوشا نەهێژا یا سیاسی بینن، ئەڤە ئەرکەکێ وژدانی، نەتەوەیی و نیشتیمانی یە و پێدڤییە هەموو لایەک ب هەستێ بەرپرسیاریەتیێ ڤە سەرەدەرییێ دگەل دا بکەن و بزڤڕنەڤە سەر ڕێکا ڕاست.

هیڤیدارم ئەڤ جەژنە ببیتە دەستپێکەک بۆ باشتربوونا رەوشا هەرێما کوردستانێ و دەربازبوونا ئاریشێن سیاسی، هەروەسا بەرقراربوونا ئاشتی، تەناهی و سەقامگیریێ ل دەڤەرا مە و سەرانسەری جیهانێ.
جەژنا هەوە پیرۆز بیت و هەردەم د خۆشی و سلامەتییێ دا بن.