ڤەكۆلەرێ کورد (عادل حسن رەشید) کو خەلکێ باژارێ دهۆکێ یە و تایبەتمەندە د زانستێن زمانى دا، گەنگەشا تێزا خوەیا دکتۆرایێ ل ژێر ناڤێ (قڕکرنا ب کۆم یا کوردان د هەوا ئەنفالێن سالا 1988ێ دا ب رێکا شرۆڤەکرنا گۆتنێن رزگاربوویو شاهدحالان و گۆتارا فەرمى) ل زانکۆیا رووان ل وەلاتێ فرەنسا ب سەرکەفتیانە کر و نامەیا دکتۆرایێ ب پلەیا هەرەباش ب دەستخوەڤە ئینا.
1. پشکا ئێکێ: خواندنەکا زمانەڤانى و شرۆڤەکرنا گۆتنێن شاهدحالێن رزگاربووی ژ هەوێن ئەنفالان و قەبارێ وێ 454 بەرپەر بوون.
2. شرۆڤەکرنا هەڤبەر بۆ بلۆگ و کەرەستێن مەیدانى، ژوان ژى تۆمارێن دەنگى کو ل هەرێما کوردستانێ هاتینە تۆمارکرن، پاشى هاتینە ڤالاکرن وەکو زمان هاتینە بەلگەکرن و پاشى بۆ زمانێ فرەنسى هاتینە وەرگێران، کو 38 تۆمارێن دەنگى یێن ب کێر شرۆڤەکرنا ئەکادیمى دهاتن بخوەڤە دگرت، قەبارێ وان ژى 401 بەرپەر بوون، گۆتنێن شاهدحالان ژى ل گۆرەى پیڤەرێن جودا هاتبوونە پۆلینکرن، وەکو دەڤەرا جوگرافى، تەخێن عەمرى یێن جودا و ژێیاتییا ئۆلى (بوسرمان، کرستیان، ئێزدى) هەرەسا تەخێن جودا وەکو (سڤیل، پێشمەرگە و گۆتارێن سەرکردێن کوردستانێ ل دۆر ئەنفالان وەکو سەرۆک بارزانى، مام جەلال)، د چارچووڤەیەکێ دیرۆکى دا کو پێکڤەژیانا ڤان پێکهاتێن ئۆلى ل وان دەڤەران دیار دکەت یێن تووشى هەوا قڕکرنێ بووین.
3. پشکا سیێ: بەلگەکرنا دیرۆکى و دیتنێ کو پشتبەستن ل سەر ئەرشیفێ سەربازى و بەلگەیێن هێرشێن کیمیایى کریە، قەبارێ وێ ژى 327 بەرپەر بوون.
ڤێ لێکۆلینێ هندەک میکانیزم دیارکرینە کو بیردانکا ب کۆم ل قوربانییان و رزگاربوویان دروست کریە، هەروەسا چاوانییا دەربڕینێ ژ بزدیانێ و ئەنجامێن وێ کریە ب رێکا زمانى. هەروەسا پێشکەفتنا بکارئینانا زمانى ل نک شاهدحالان بەحس کریە، ژ وان ژى بکارئینانا زاراڤێن بیانى وەکو (عەرەبى، کوردی یا ستاندارد و دەربڕینێن تێکهەل)، ئەڤە ژى رەنگڤەدانا کارتێکرنا کۆچبوونێ و فێرکرنێ و دوبارە ئاڤاکرنا جڤاکێ کوردستانێ یە.
هەروەسا لێکۆلینێ رەهندەکێ گرنگ یێ جڤاکى دیارکرینە کا کارتێکرنا عەرەبکرنێ ل سەر زمانێ شاهدحالان د د ەمێ ئەنفالان دا چەند بوویە، کو بیردانکا رزگاربوویان هندەک زاراڤێن گرێداى ب وێ روودانێ ژبەرکرینە و دوبارە د ئاخفتنێن خوەیێن رۆژانە دا بکاردئینن وەکو نیشانەکا زمانەڤانى بۆ وێ بزدیانێ و ئەو سەربۆرا دیرۆکى.
ل همبەرى ڤێ یەکێ، لێکۆلینێ دیارکرییە کو بەرەبابکێ دویێ ژ کورێن رزگاربوەیان، یێن ل سەردەمێ سەقامگیرییا هەرێما کوردستانێ و بەرفرەهبوونا سیستەمێ فێرکرنێ ب زمانێ کوردى مەزن بووین، شێوازەکێ زمانى یێ جودا بکاردئینن، ل گەل کێمبوونا بکارئینانا زاراڤێن ژ سەردەمێ شاهدحالان بۆ هاتین، هەروەسا دیاربوونا گۆتارەکا زمانى یا پتر ستاندارد کو ل ژێر کارتێکرنا فێرکرنێ و سازیێن فەرمى دا دروستبوویە
ئەڤ گوهۆرینا دینامیکى کارڤەدانا وێ پەیوەندییا ئالۆزە د ناڤبەرا زمانى و بیردانکێ و ناسنامێ دا، ژبەرکو بیردانکا دەڤۆکى یا رزگاربوویان نەوەکو گوهۆرینێن فێرکرنێ و جڤاکى د جڤاکێ سەردەمێ کوردى دا.
ژ ئالیێ خوەڤە لژنا گەنگەشێ کو ژ حەفت مامۆستا و لێکۆلەرێن فرەنسى پێکدهات، پەسنا هوورگلییێن ڤێ تێزێ و رەسەناتییا وێ و پشکدارییا وێ د بیاڤێن زمانەڤانى یێن گۆتار و لێکۆلینێن قڕکرنا ب کۆم دا کر.
ل دوماهییا گەنگەشێ، لژنێ باوەرنامەیا دکتۆرا ل گەل بلندترین پلەیا رێزگرتنێ ب لێکۆلەرى بەخشى و لژنا گەنگەشێ بۆچصوونا خوە دیارکر (Félicitations du jury)، هەروەسا لژنێ داخواز ژ لێکۆلەرى کر بەردەوامییێ بدە کارێن خوە و هەڤکارییێ ل گەل زانکۆیێن ئەورۆپا بکەت بۆ پێشخستنا ڤی بیاڤێ لێکۆلینێ و کوورکرنا لێکۆلینان ل دۆر بیردانکا ب کۆم یا گەلێ کورد.
ژ ئالیێ خوەڤە لێکۆلەرى سوپاسییا ئەندامێن لژنێ کر ژبۆ کارلێکا وان یا زانستى و گرنگییا وان ب بابەتێ قوربانیێن هەوا ئەنفالان، هەروەسا بۆ وان گەنگەشێن ئەکادیمى یێ ل روونشتنێ هاتین.
هەروەسا لێکۆلەر عادل حەسەن رەشید ب رێیا دهۆک تیڤى بۆ حکومەتا هەرێما کوردستانێ پێشنیاز کر ب حوکمێ پەیوەندییێن وێ یێن باش ل وەلاتێ فرەنسا، مۆزەخانەیەکێ ڤەکەت بۆ پاراستن و ئەرشیفکرنا جلک، بیرهاتن، وێنەیێن کوردێن کەفتینە بەر هەوا ئەنفالان ل ئیراقێ، هەر ژ قڕکرنا کوردێن فەیلى، بارزانییان، هەلەبچە و هەتا هەوێن ئەنفالان، هەروەسا حکومەتا کوردستانێ ل گەل حکومەتا ئیراقێ ب رێیا تیمێن ناڤدەولەتى ل لەشمایێن قوربانییان بگەرن و کار بۆ ئەرشیفکرنا جینۆسایدا کورد بکەن. داکو رێ ل بەر لێکۆلەرێن فرەنسى ڤەکەن کار ل سەر ڤان بەلگەیان بکەن، ب ئارمانجا رێگرتنێ ل دوبارەبوونا ڤان قڕکرنان و ل گەل قڕکرنێن دى یێن مەزن ل جیهانێ هەڤبەر بکەن، هەروەسا پشتەڤانییا تایبەتمەند و بسپۆرێن کورد بکەن یێن پلەیێن زانستى یێن بلند وەرگرتین د ڤى وارى دا، پێخەمەت بەردەوامییا لێکۆلینێ و بەلاڤکرنی و شەرمزاکرنا جینۆسایدا کورد ل پاریسێ و ئەورۆپا.
