وەزارەتا سامانێن سروشتی پێنج بڕیار بۆ چارەسەرکرنا کێشا بەنزینێ دەركرن

وەزارەتا سامانێن سروشتی یا حکومەتا هەرێما کوردستانێ، ب مەرەما دووماهی ئینان ب کێشا کێمیا بەنزینێ و پێداچوونکرنێ ب بهایان ڤە، پێنج بڕیارێن نوو دەرخستن، ژ وان ژی زێدەکرنا پشکەکا بەنزینا 750 دیناری و ئاسانکاری کرن بۆ ئینانا سووتەمەنیێ.
ئەڤرۆ سێشەمبی، 28ـی تیرمەها 2026، کەمال محەممەد سالح، وەزیرێ سامانێن سروشتی ب وەکالەت، سەرپەرشتیا کۆمبوونەکا تایبەت ب بهایێ بەنزینێڤە کر، ئارمانجا کۆمبوونێ دابینکردنا بەنزینێ، پێداچوونکرن ب بهایان و ڤەدیتنا چارەسەریێ بۆ کێشا کێمیا بەنزینێ بوو.
د کۆمبوونێ دا پێنج بڕیارێن گرنگ هاتنە دان:
. وەزارەتا سامانێن سروشتی هەمی بزاڤان دكەت بۆ زێدەکرنا پشکا حکومەتا هەرێمێ ژ نەفتا خاڤ ژلایێ حکومەتا فیدرالیڤە، نوکە بەغدا ب تنێ ڕۆژانە 50 هزار بەرمیلێن نەفتێ ددەتە هەرێمێ، ئەڤ رێژە ژی دبیتە 39.46%ـی پشکا هەرێمێ، د دەمەکی دا رێژا شایستەیێن ڕاستەقینە یێن هەرێما کوردستانێ دبنە 12.67% و یەکسانە ب ڕۆژانە 126 هزار و 700 بەرمیلان.

. زێدەکرنا رێژا بەنزینا نۆرماڵا پالپشتیکری یا حکومی ب بهایێ 750 دیناران بۆ هەر لترەکێ، ب هەماهەنگی دگەل هەموو پارێزگەهـ و ئیدارێن سەربەخۆ.
. چاڤدێرکرنا ڕۆژانە یا بەنزینا بازرگانی بۆ جۆرێن (نۆرمال، محەسن و سوپەر) ژ لایێ کوالێتیێ و گونجانا وێ دگەل ڕەوشا ڕۆژانە یا بازاڕێ نوکە یێ هەرێما کوردستانێ.
. بەرفرەهكرنا کار و چالاکیێن لژنێن چاڤدێری و دووڤچوونێ یێن ڕێڤەبەرییا نەفت و کانزایان ل پارێزگەهـ و ئیدارێن سەربەخۆ بۆ پاراستنا کوالێتییا جۆرێن بەنزینێ.
. پێشکێشکرنا هەموو ئاسانکارییان بۆ ئینانا بەنزینێ و ماددێن کیمیایی، لدووڤ مەرج و ڕێنمایێن وەزارەتا سامانێن سروشتی.