دەقێ پەیاما سەرۆك بارزانی:
ب ناڤێ خۆدایێ مەزن و دلوڤان
ئەو تاوانا تیرۆرستێن داع*شێ 12 سالان بەری نوكە ب دژی خووشك و برایێن ئێزدی كری، ئازارەكە دێ بۆ هەتا هەتایێ د هزرا كوردستانییاندا مینیت.
ئێزدی ژبەر كوردبوون و ڕەسەنایەتی و بیر و باوەرێن خۆ یێن ئایینی كەڤتنە بەر شالاوێن كەربێ و ڕەفتارێن نەمرۆڤانە یێن تیرۆرستێن داع*شێ و هاتنە جینوسایدكرن، ئەو تاوانا سەر دەستێ داعشێ ل دەڤەرا شنگالێ هاتییە كرن، درێژەپێدەرا ئەوێ زنجیرەیا كارەسات و كۆمەلكۆژی و تاوانان بوو یێن ب درێژاهییا مێژوویێ دژی گەلێ كوردستانێ هاتینە كرن.
ل 12 سالییا ئەوێ كارەساتێ، سلاڤ ل گیانێ شەهیدان و قۆربانییێن ئەوێ تاوانێ، سلاڤ بۆ دلێری و چاڤ نەترسییا ئەوان پێشمەرگەیێن قارەمان یێن ل سەر چیایێ شنگالێ ماین و ڕێ نەدایی دەستێ تیرۆرستان بگەهیتە چیایێ شنگالێ، سلاڤ بۆ وەفاداری و ئازایەتییا هەموو ئەوان پێشمەرگەیێن قارەمان یێن بۆ شكاندنا دوورپێچا چیایێ شنگالێ و ئازادكرنا باژارێ شنگالێ خوین بەخشی و ئەفسانەیا داع*ێ شكاندی.
هەروەسا ژ دل سوپاسگوزارییا خۆ ئاراستەیی هەموو تاكەكێ سەربلندێ كوردستانێ دكەین، كو وەكو ئێك جەستە هەڤسوز و هەڤخەمێن خووشك و برایێن ئێزدی بوون، دگەل ڕێز و سوپاسییێن مەزن بۆ هێزێن هەڤپەیمانان كو ڕۆلەكێ دیار دهاریكاریكرنا پێشمەرگەیی و پاشڤەبرن و شكاندنا تیرۆرستاندا هەبوو.
ل یادا وێ كارەساتێ بۆ خووشك و برایێن ئێزدی دووپات دكەم، دێ ب هەموو شیانان پشتەڤانییا حەز و داخوازییێن وان بم، داخوازێ ژێ دكەم ژ پێشمەخەت مسۆگەركرنا پاشەرۆژەكا گەش دناڤخۆدا ئێك ڕێزبن و هیڤی ب پاشەرۆژێ هەبن، بێگومان ئەو ڕەوشا سەپاندی و نەئاساییا ل شنگالێ هەی بۆ هەتا هەتایێ نابیت، دڤێت خووشك و برایێن مە یێن ئێزدی ب سەربلندیڤە ڤەگەرنە جهێن باب و باپیرێن خۆ و قەرەبوویا زیان و ئازارێن وان بهێتە كرن.
هزاران سلاڤ ل گیانێ پاقژێ شەهیدێن شنگالێ و هەموو شەهیدێن ڕێیا ئازادییا كوردستانێ.
مەسعود بارزانی
3ی ئابا 2026ێ
