وەزیرێ ناڤخۆ ئاماژە ب هندێ دا، ئەنفال بزاڤەكا نەزووك بوو بۆ ژێبرنا جهناسییا گەلێ كوردستانێ، لێ ئیرادەیا گەلێ وان ب سەركەڤت، گوت ژی: ئەڤرۆ ل جهێ خۆیە دەستێ ئەوان دایك و خۆشكێن مەزن ماچی بكەن یێن پشتی شەهیدبوونا باب و هەڤژین و برایێن خۆ، بووینە هیڤینێ شۆرشا بەرخۆدانێ و پەروەردەكرنا نڤشەكی كو نوكە دژی تارییاتی و زۆلمێ شەڕی دكەن.
ڕێبەر ئەحمەدی دووپاتی ل پابەندبوونا حكومەتێ كر بۆ هەماهەنگیكرنێ دگەل حكومەتا فیدرال و ناڤەندێن جیهانی ب مەرەما كۆلانا گۆڕێن ب كۆم و نیاسین و ڤەگەڕاندنا ڕۆفاتان بۆ باوەشا كوردستان، دڤی بیاڤیدا پەسنا ڕۆلێ سەركردایەتییا سەرۆك بارزانی كر و گوت: ب بزاڤێن جەنابێ وان هەتا نوكە ڕۆفاتێن زێدەتر ژ 700 شەهیدان هاتینە ڤەگەڕاندن و ئەو فێركرن كو ئەنفالێ نەكەنە كەرب و تۆلڤەكرن، بەلكو بكەنە هیڤینێ برایەتی و لێخۆشبوونێ.
هەروەسا ئاشكراكر، ئازادییا ئەڤرۆ بەرهەمێ خوینا شەهیدایە، هۆشدارییەكا توند دا وان كەسا یێن دەست دگەل دوژمانان تێكەل كری بۆ تێكدانا قەوارەیێ هەرێمێ و گوتی: دێ بیرا وان ئینیت كو ئەڤ قەوارەیە و دامەزراوەیێن وێ ب خوینا شەهید و ئەنفالان ب دەستڤەهاتینە و زەند و دەستێن پێشمەرگەی هاتینە پاراستن.
