ویلایه‌تێن ئێكگرتى یێن ئه‌مریكا ژبه‌ر كڕینا سیسته‌مێ ئێس چارسه‌د یێ به‌رگریێ یێ رۆسى، ب فه‌رمى سزا ل سه‌ر كه‌رتێ پیشه‌سازییا به‌رگرییا توركیا و ئسماعیل ده‌میر، سه‌رۆكێ وى كه‌رتى سه‌پاندن، سامان و پارێ ناڤبرى ژى دێ هێته راگرتن و ڤیزا ئه‌مریكا ژى پێ ناهێت دان.
مایك پۆمپێیۆ، وه‌زیرێ ده‌رڤه‌یێ ئه‌مریكا د تویته‌كى دا راگه‌هاند، سه‌ره‌راى هۆشداریێن وان توركیا ل سه‌ر كڕین و تاقیكرنا سیسته‌مێ ئێس چارسه‌د یێ به‌رگرییێ یێ رۆسى به‌رده‌وام بوو، سه‌پاندنا سزایێن نها ژى ل سه‌ر كه‌رتێ پێشه‌سازییا به‌رگرییا توركیا، وێ یه‌كێ دگه‌هینیت كو ئه‌مریكا دێ ب قانوونێ به‌رهنگارى دوژمنێن ئه‌مریكا بیت ب رێیا سه‌پاندنا سزایان، چ لێبۆرین ژى همبه‌رى سه‌ره‌ده‌ریێ د گه‌ل كه‌رتێ به‌رگرییا رۆسیا نابیت.
ژالیێ خوه‌ڤه حكومه‌تا توركیا سزایێن ئه‌مریكا ب تاكلایه‌نانه ب ناڤ كرن و ئه‌و سزا شه‌رمزار كرن و راگه‌هاند، د ده‌مێ گونجاى دا دێ به‌رسڤا دروست هه‌بیت.
ئسماعیل ده‌میر، سه‌رۆكێ كه‌رتێ پیشه‌سازییا به‌رگرییا توركیا ژى راگه‌هاند، سزایێن ئه‌مریكا هه‌لویستێ وى و هه‌ڤالێن وى ناگوهۆریت و ب چ ره‌نگان رێ ل به‌ر پیشه‌سازییا به‌رگرییا توركیا ناگریت و گۆت: توركیا بزاڤان دكه‌ت ل ژێر سه‌ركردایه‌تییا ره‌جه‌ب ته‌یب ئه‌ردۆغانى، سه‌رخوه‌بوونا ته‌مام د وارێ پیشه‌سازییا به‌رگریێ دا وه‌رگریت.
