خانی نیوز:
ته‌ڤگه‌را تالیبان پاشئێخستنا دانوستاندنێن ئاشتییێ د گه‌ل حكومه‌تا ئه‌ڤغانستانێ بو ده‌مێ بیست روژان راگه‌هاند، دهه‌مان ده‌م دا هێرشه‌كا مۆشه‌كى كره سه‌ر كابۆلا پایته‌ختێ وى وه‌لاتى.
محه‌مه‌د نه‌عیم، په‌یڤدارێ ته‌ڤگه‌را تالیبان د تویته‌كى دا راگه‌هاند، هه‌ردو لایه‌نێن دانوستاندكارێن ئه‌ڤغانى، لیستێن ده‌ستپێكى یێن خالێن كارنامه‌یێن خۆه لێكگوهارتینه و ئه‌و دبینن وان پێدڤى ب دانوستاندنێن ده‌ستپێكى یێن زێده‌تر هه‌یه بو رۆنكرنا هنده‌ك ژ وان خالان. محه‌مه‌د نه‌عیم گۆت: ژبه‌ركو كارناما وان پێدڤى ب دانوستاندنێن زێده‌تره، هه‌ردو ئالى ل سه‌ر بێهنڤه‌دانێ بۆ ده‌مه‌كى رێكه‌فتن، ل رۆژا پێنجى مه‌ها بهێت دانوستاندنێن وان دێ ده‌ستپێكه‌نه‌ڤه.
گه‌له‌ك خالێن ناكوك دناڤ دانوستاندنێن تالیبان و حكومه‌تا ئه‌ڤغانستانێ دا هه‌نه، حكومه‌تا كابۆلێ داخاز دكه‌ت پێشینا رێكه‌فتنێ ئاگربه‌ست بیت ل سه‌رانسه‌رى وه‌لاتى، لێ تالیبان داخاز دكه‌ت پێشینه بۆ ئازادكرنا زیندانییان و راكرنا سزایێن سه‌ر سه‌ركردێن تالیبان بیت، پاشى ئاگربه‌ست بهێته راگه‌هاندن.
ژ ئالیێ خوه‌ڤه جڤاتا پێكهاتنا ئه‌ڤغانستانێ دڤێت ب زویترین ده‌م ئاگربه‌ست بهێته راگه‌هاندن ژبه‌ركو تالیبان به‌رده‌وام هێرشان دكه‌ت و قوربانیێن مه‌زن دهێنه دان.
راگرتنا دانوستاندنان هه‌ڤده‌م بوو دگه‌ل هێرشه‌كا مۆشه‌كى یا تالیبان بۆ سه‌ر كابۆل و د وێ هێرشێ دا سڤیله‌كى ل نێزیك فرۆكخانا كابۆل ژیانا خوه ژ ده‌ست دا.
