ئه‌ندامه‌كێ لژنا دارایی ل جڤاتا نوونه‌رێن ئیراقێ ل دۆر رێككه‌فتنا دناڤبه‌را هه‌رێمێ و به‌غدا دا دیار كر، هه‌رێم و به‌غدا ڤه‌گه‌ریانه خالا سفرێ و نه‌گه‌هشتنه رێككه‌فتنێ.
د.جه‌مال كۆچه‌ر، سه‌رۆكێ فراكسیۆنا ئێكگرتوویا ئیسلامى و ئه‌ندامێ لژنا دارایی ل جڤاتا نوونه‌رێن ئیراقێ راگه‌هاندیه، گوتۆبێژێن د ناڤبه‌را شاندێ بلند یێ هه‌رێمێ و به‌رپرسێن ئیراقى گه‌هشتنه بنبه‌ستێ و هاتینه راگرتن، هه‌ر ئێكێ ژ وان داكۆكی ل سه‌ر بۆچوون و داخوازیێن خوه یێن جۆدا د‌كه‌ن.
گۆتیه ژى، دانوستاندن دو جۆرن، ئێك ژ وان بۆ پشكداریكرنا هه‌رێما كوردستانێ یه د قانوونا كورتئینانی دارایی دا، ئه‌و ژى به‌غدا داخوازا 250 هزار به‌رمیلێن په‌ترۆلێ و نیڤا داهاتێ خالێن گومركی دكه‌ت، به‌لێ هه‌رێم ره‌تدكه‌ت په‌ترۆلێ راده‌ست بكه‌ت، به‌لكو ئاماده‌یی بۆ پێدانا بهایێ وان 250 هزار به‌رمیلێن په‌ترۆلێ ده‌ربرینه.
سه‌رۆكێ فراكسیۆنا ئێكگرتوو گۆت ژى: دانوستاندنێن دویێ یێن دناڤبه‌را شاندێ هه‌رێمێ و به‌رپرسێن به‌غدا گرێدایه ب پرۆژه‌قانوونا بودجا 2021 ڤه، ئه‌و ژى ب هه‌مان شێوه به‌غدا ئاماده‌یی بۆ هنارتنا پشكا بودجێ هه‌رێما كوردستانێ ده‌ربرییه، د به‌رامبه‌ر دا داخوازا 265 هزار به‌رمیلێن په‌رۆلێ دكه‌ت و ئه‌و دخوازن وێ په‌ترۆلێ وه‌ربگرن و بفرۆشن، چونكى به‌غدا 15 دۆلاران زێده‌تر ژ بهایێ هه‌رێمێ دفرۆشیت.
جه‌مالى ئه‌و ژى دیار كرییه: هه‌رێما كوردستانێ ئاماده‌یا خوه دیار كرییه، كو داهاتێ فرۆشتنا 465 هزار به‌رمیلێن په‌ترۆلێ راده‌ستی به‌غدا بكه‌ت، به‌لێ به‌غدا یا رژده ل سه‌ر وه‌رگرتنا وێ په‌ترۆلێ و هنارتنا لژنه‌كێ بۆ هندێ 50% یا داهاتێ وان خالێن گومركی وه‌ربگریت و چاڤدێریا بزاڤێن گومركى بكه‌ت، ژ‌به‌ر هندێ هه‌ردو ئالى ڤه‌گه‌ریاینه خالا سفرێ و نه‌گه‌هشتینه رێككه‌فتنێ.
