سه‌رۆكێ حكومه‌تا هه‌رێما كوردستانێ ب رێیا تێله‌فۆنێ په‌یوه‌ندى ب هنارتیێ تایبه‌تێ ئه‌مریكا بۆ كاروبارێن سووریێ كر و راگه‌هاند، په‌كه‌كه ب بزاڤێن خوه بۆ ده‌ستوه‌ردانێ د خوه‌نیشادانێن وه‌لاتیێن هه‌رێمێ دا، گه‌فان ل سه‌قامگیریا ده‌ڤه‌رێ دكه‌ت، كو ده‌مێن بوورى سێ پێشمه‌رگه و كارمه‌نده‌كێ ئاساییشێ ب ده‌ستێ وان هاتینه شه‌هیدكرن.
حكومه‌تا هه‌رێما كوردستانێ د به‌یانه‌كێ دا راگه‌هاند، مه‌سروور بارزانى سه‌رۆكوه‌زیرێن هه‌رێما كوردستانێ په‌یوه‌ندییه‌كا تێله‌فۆنى د گه‌ل جوێل ره‌یبێرن، هنارتیێ تایبه‌تێ ئه‌مریكا بۆ كاروبارێن سووریێ كر و هه‌ردو ئالییان گۆرانكاریێن ره‌وشا سووریێ گۆتوبێژ كرن.
ل گۆره‌ى به‌یانا حكومه‌تا هه‌رێما كوردستانێ، مه‌سروور بارزانى و جوێل ره‌یبێرن دوپات ل گرنگیا دانوستاندنێن ئاشتییانه د ناڤبه‌را ئالیێن كوردى یێن رۆژئاڤایێ كوردستانێ كر، بۆ وێ یه‌كێ ئازادى و فره‌ئالییا سیاسى و پشكداریا ده‌ستهه‌لاتێ ل وێ پارچا كوردستانێ هه‌بیت و ب هه‌ڤرا به‌رهنگارى گه‌فا داعشێ ببن كو هێشا ل وێ ده‌ڤه‌رێ مایه.
سه‌رۆكوه‌زیرێن هه‌رێمێ دوپات ژى كر، كو پێدڤیه هێزێن سووریا دیمۆكرات هه‌سه‌ده خوه ل ژێر هه‌ژموونا په‌كه‌كێ ده‌ربێخیت و نابیت ئێدى په‌كه‌كه مفاى ژ وان هاریكارییان وه‌رگریت یێن بۆ هه‌سه‌دێ دهێنه پێشكێشكرن.
مه‌سروور بارزانى بۆ هنارتیێ تایبه‌تێ ئه‌مریكا بۆ كاروبارێن سووریێ ئاماژه ب هێرشا شه‌ڤێن بوورى یا چه‌كدارێن په‌كه‌كێ ل هێزێن پێشمه‌رگه‌ى ل ده‌ڤه‌را ئامێدیێ كر و ئه‌و هێرش شه‌رمزار كر و ئاشكرا كر، سێ پێشمه‌رگه و كارمه‌نده‌كێ ئاساییشێ ب ده‌ستێن په‌كه‌كێ هاتینه شه‌هیدكرن.
مه‌سروور بارزانى گۆت ژى: هێرشێن په‌كه‌كێ و بزاڤێن وان بۆ ده‌ستوه‌ردانێ د خوه‌نیشادانێن ئاشتییانه یێن وه‌لاتیێن هه‌رێمێ دا، گه‌فن ل سه‌ر سه‌قامگیریا ده‌ڤه‌رێ.
