دناڤا دیرۆكا کوردان دا، گەلەك زانا و داهێنەر هاتینە و خزمەتەکا مەزن بۆ وەلاتی و مرۆڤایەتیێ و کوردایەتیێ کرییە .
حهسهن حەداد یێ بەرنیاس ب (حسو) حەداد ئورەماری ، ئێك ژ وان کەسان بوویە یێن کو شارەزایی د هەر ئێك ژ زانستێن ئەندازیاری و میکانیکی دا هەبوویە و داهێنان کرینە .
محەمەد حهسو حەداد بۆ خانی نیوز دبێژیت: باپیرێ وى ل باکورێ کوردستانێ ل گوندێ ئورەمارێ دژیا و کارێ حەدادیێ دکر، لێ ژبەر کاودانێن نەخۆش یێن وى سەردەمى، کو سەرهەلدانا ئورەمارێ یا بناڤێ عسیانا ئورەمار سەرهەلداى ل گەل تورکێن ئۆسمانی، وی دەمی نەچار دبیت و گوندێ خوە بجهـ دهێلیت بەر ب باشوورێ کوردستانێ دهێت و ل گوندێ مروانس ل دەڤەرا رێکان ئاکنجی دبیت، پشتی وی بابێ وى یێ ژدایكبوویێ ۱۹۲۲ ل گەنجاتیا خوە بەردەوامی ب ڤی کاری دایە و بوویە داهێنەرەکێ بناڤ و دەنگ ل ڤێ دەڤەرێ، مینا کارێ حەدادیێ چێکرنا تەڤر و مەر و بڤر و داسا و تهفشی لیهازا، هەروەسا دروستکرنا ئاشێن ئاڤێ یێن چێکرنا ئارى و تەحینێ و چێکرنا دستار و جوهنیا و بەردانکا .
حسویێ حهداد گۆت ژى: هەر ژ دەڤەرا هەکاریا ههتا دەڤەرا ئامێدیێ هەر ئاشەکێ هاتبا دانان ل سەردەستێ ئەندازیار و شارەزایێ ئاشان حسویێ حەداد دهاتە دروستکرن و دانان و ههروهسا گێسن و نیرکو و ههڤجار ژبو جۆتکرن ب گا و دەواران دروست دکرن، بۆ وێ یەکێ خەلکێ دەڤەرێ مفای ژ چاندنێ وەربگریت، هەروەسا ل وێ دەڤەرێ دەمێ تڤەنکا ئێکی شکەستبا ئانکو ژکار کەفتبا دا ئیننە دەف حسویێ حەداد دابۆ دروست کەت، تڤەنگێن وی دەمی رەشوکی و سێتیرە و برنۆ بوون .
ل گۆرهى گۆتنا حسوى، مالباتا وان کارێن نۆشداریا کوردەواری ژی دکر و دەرمان ژ گیایی دروست دکرن و ددان د ئینانەدەر ئەگەر پێدڤی کربا، ژبۆ خزمەتکرن و خەلکێ دەڤەرێ.
دیار ژى کر، ئەو وەکو ئەندامێن ڤێ مالباتێ کور و نەڤی و برا و برازایێن حسویێ حەداد ل سەر هەمان کارێت باب و باپیرێن خوه بەردەوامن، هەم ژ ئالیێ حەدادیێ ڤە و هەم دانان و دروستکرنا ئاشێن ئاڤێ و نها حەفت دوکانێن حەدادیێ ل ناحیا شێلادزێ هەنە و هەموو ژی ئەندامێن مالباتا وان کار تێدا دکەن، ههروهسا نها دو کورێن وى ب ناڤێ ئازاد و رزگار کارەکێ جودا ژ کارێن حەدادیێ دکەن ئەو ژی دانانا کەنالەکێ تیڤیێ یە کو حەز و ڤیانا وان ل سەرکارێن تەکنولوجیایێ هەیە و هەروەسا دوکانێن پرۆگۆامكرنا موبایل و لاپتوپ و تلستارا و دانانا سەتەلایتا هەنە
ئێقبال عومەر، شێلادزێ
