مامۆستایه‌كێ زانكۆیا دهۆكێ ئاشكرا كر، سه‌ردانا كازمی بۆ توركیا چه‌ندین ته‌وه‌رێن گرنگ دناڤبه‌را هه‌ر دو وه‌لاتان دا هاتنه به‌حسكرن، ژ وانا لڤینێن په‌كه‌كێ و بهێزكرنا په‌یوه‌ندیێن ئابووری د ناڤبه‌را به‌غدا و ئه‌نقه‌ره دا.
د. زێره‌ڤان به‌رواری، مامۆستایێ زانكۆیێ ل دۆر سه‌ردانا شاندێ حكومه‌تا ئیراقێ بۆ توركیا بۆ خانی نیوز گۆت: چوونا شاندێ ئیراقێ بۆ توركیا ل سه‌ر چه‌ند باده‌كان بوو ژ وانا باده‌كێن (سیاسی، ئێمناهی، ئابووری) د ناڤبه‌را هه‌ردو وه‌لاتان دا، بۆ جارا ئێكێ یه حكومه‌تا ئیراقێ ب فه‌رمی داخواز ژ توركیا دكه‌ت ئۆپه‌راسیۆنێن خوه ل سه‌ر هێزێن په‌كه‌كێ ل ناڤا هه‌رێما كوردستانێ راوستینت، ئهو یه‌ك ژى بۆ توركیا تشته‌كێ نوو بوو، توركیا ژی ب هه‌می شێوازان سه‌رده‌ریێ ل گه‌ل ئیراقێ دكه‌ت بۆ وێ چه‌ندێ ئهو وه‌لاتێ جیران ژ ده‌ستان نه‌چیت، كازمی یێ هه‌می بزاڤا دكه‌ت سه‌روه‌ریا ئیراقێ بهێته پاراستن.
د.زێره‌ڤان به‌رواری گۆت: كازمی هه‌می بزاڤان دكه‌ت فشارێن ئابووری ل سه‌ر ئیراقێ سفك ببن و ئهو یه‌ك ژی ب خورتكرنا په‌یوه‌ندیێن ئابووری ل گه‌ل وه‌لاتێ توركیا دێ هێته كرن، ژ روویێ سیاسیژى ڤه سه‌رۆكوه‌زیرێن ئیراقێ پێدڤی ب هاریكاریا وه‌لاتێن هه‌رێمێ یه دا بشێت سه‌ركه‌ڤیت، دێ هه‌موو بزاڤان كه‌ت نێزیك بوون د ناڤبه‌را وی و توركیا دا دروست بن و دێ هه‌موو كارا كه‌ت بۆ توركیا دیاربكه‌ت كو ئه‌ڤ سه‌رۆكوه‌زیره نه وه‌ك سه‌رۆكێن به‌ری یه كو ل بن فشارا ئیرانێ بریارا ده‌ت.
مامۆستایێ زانكۆیا دهۆكێ گۆت ژی: نابینیت سه‌ره‌دانا كازمى بۆ رێكه‌فتنه‌كێ بیت ل گه‌ل وه‌لاتێن هه‌رێمێ بۆ نه‌هێلانا قه‌وارێ سیاسی یێ هه‌رێما كوردستانێ، ژبه‌ركو هه‌كه پشته‌ڤانیا هه‌رێما كوردستانێ نه‌با گه‌له‌ك بزحمه‌ت ئه‌ڤ كه‌سه ببا سه‌رۆكوه‌زیرێن ئیراقێ و بۆ قۆناغا بهێت ژی پێدڤی ب پشته‌ڤانیا كوردانه، ره‌نگه پرۆژه‌ك هه‌بیت بۆ نه‌هێلانا قه‌وارا هه‌رێمێ لێ بۆ ڤێ قوناغێ نه به‌لكو ره‌نگه بۆ قۆناغا بهێت هه‌بیت، ب تنێ ره‌نگه به‌حسێ رێكه‌فتنا په‌ترۆلێ یا د ناڤبه‌را هه‌رێمێ و توركیا دا هاتبیت به‌حسكرن، ژبه‌ركو نوكه ل ناڤخوه‌یا ئیراقێ گه‌له‌ك به‌حسێ ڤێ رێكه‌فتنێ دهێته‌كرن و ئهو ناكوكیێن هه‌رێمێ و به‌غدا گه‌هشتینه ئاسته‌كی كو ئێدی ل ناڤا ئیراقێ ناهێنه چاره‌سه‌كرن، كازمی دێ هه‌موو بزاڤا كه‌ت كو توركیا رازیبت ده‌ست به‌ردایێ ڤێ باده‌كێ بیت ل گه‌ل هه‌رێما كوردستانێ پێخه‌مه‌ت چاره‌كرنا ناكوكیێن هه‌رێمێ و به‌غدا.
به‌رواری ئهو ژی گۆت: ئیراق و توركیا پێدڤی ب هه‌ڤكاریا ئێكدو هه‌یه دا بشێن پاشه‌رۆژێ دا به‌رژوه‌ندیێن ئێك و دو بپارێزن و ئه‌گه‌ر نه دێ هه‌ر دو وه‌لات زه‌ره‌رمه‌ندبن.
خانی نیوز، سالار محه‌مه‌د دۆسكی:
