تۆپخانه و فرۆكه‌یێن شه‌ركه‌رێن توركیا سپێده‌هیا ئه‌ڤرۆ هه‌شت گوند و ده‌ڤه‌رێن سنۆرێ باژاركێن باتیفا و ده‌ركارێ سه‌ر ب قه‌زا زاخۆ ڤه تۆپباران كرن.
نزار مه‌جید گولى، په‌یامنێرێ خانى نیوز ل ده‌ڤه‌را باتیفا راگه‌هاند، هه‌شت گوند ل سنۆرێ بێگۆڤا و بایتفا ژ ئالیێ تۆپخانه و فرۆكه‌یێن شه‌ركه‌رێن توركیا ئه‌ڤرۆ هاتن تۆپباران كرن، ژ وانا گوندێن رسێ و شێدنه ل باكورێ باژاركێ باتیفا، كالگوهۆرێ و به‌رانشێ ل ده‌ردۆرا بێگۆڤا و گوندێن خیزاڤا و مه‌لا عه‌ره‌ب و بانكێ و منینێ و ئه‌ڤله‌هێ ل رۆژئاڤایێ باتیفا.
په‌یامنێرێ خانى نیوز ئاشكرا ژى كر، تا نها زیانێن وان تۆپبارانان نه‌هاتینه زانین، لێ ترسه‌كا مه‌زن كه‌فتیه ناڤا خه‌لكێ وێ ده‌ڤه‌رێ.
ژ ئالییه‌كێ دى ڤه دوهى ئێڤارى رۆژا ئه‌ینى فرۆكه‌یێن شه‌ركه‌رێن توركیا گوندێن سنۆرێ ناوچه‌دارییا شێلادزێ سه‌ر ب قه‌زا ئامێدیێ ڤه بۆمبه‌باران كرن، ژ وانان گوندێن شامكێ، سنجێ، كوكه‌رێ و شاجا ل ده‌ڤه‌را رێكانییان.
د سێ سالێن بوورى دا ژ ئه‌گه‌رێ هێرشێن سوپایێ توركیا ل ده‌ڤه‌رێن سنۆرى یێن هه‌رێما كوردستانێ ب به‌هانه‌یا هه‌بوونا چه‌كدارێن پارتییا كاركه‌رێن كوردستانێ په‌كه‌كێ، ژبلى زیانێن ماددى تا نها سیهـ و سێ وه‌لاتیێن سڤیل شه‌هید بووینه و هه‌ژماره‌كا مه‌زن یا خه‌لكى گوندێن خوه چوول كرینه.
