رۆژەڤا گەرما ئیراق و ھەرێما کوردستانێ بلندبوونا بھایێ دۆلاریە ھەمبەر دینارێ ئیراقی و بسپۆرەکێ سیاسەتا دارایی ژی ل دۆر کارڤەدانێن جادەیا ئیراقێ ھۆشداریێ ددەت و دبێژیت: ھەکە بریار نەھێتە گۆھۆرین دێ پێلەکا دی یا خوەنیشادان ئیراقێ ڤەگریت.
دکتۆر ئەرشەد تەھا، بسپۆرێ سیاسەتا دارایی بۆ خانی نیوز دیارکر، بلندبوونا بھایێ دۆلارێ ئەمریکی ھمبەر دراڤێ ئیراقی سەرناگریت، ژبەرکو پلانەکا سەرکەفتی نابیت بۆ پڕکرنا کورتئینانا بودجێ ئیراقێ، تنێ ئەڤسالە بودجێ ئیراقێ ٥٨ ترلیۆن دینار کورتئینان ھەیە و ھەکە بریارا بلندکرنا دۆلاری یا بەردەوام بیت ئەڤە پێشبینی دھێتەکرن پێلەکا دی یا خوەنیشادانان دێ ئیراقێ ڤەگریت.
بسپۆرێ سیاسەتا دارایی ئاماژە ژی کر، بلندکرنا بھایێ دۆلاری دێ کارتێکرن ل سەر بلندبوونا بازاری ھەبیت و رێژا ھەژاریێ دێ ھێشتا زێدە بکەت ل ئیراقێ، لەورا پێدڤیە بەرپرس و حکومەتا ئیراقێ ئەڤێ چەندێ بەرچاڤ وەرگرن و د زیانێن بلندبوونا دۆلاری بگەھن.
دکتۆر ئەرشەد تەھا گۆت ژی: قەیرانێن دارایی ل ئیراقێ سالا بھێت دێ ھێشتا ئالۆزتربن، ژبەر سیاسەتا شاش یا ئیراقێ، نوکە ٩٢%ێ داھاتی ئیراقێ پەترۆلە و پێدڤیە کار بھێتەکرن ژێدەرێن داھاتی بھێنە زێدەکرن تنێ ھەر پەترۆل نەبیت، پتریا وان ولاتێن داھاتێ وان پەترۆل یێ بەر ب ئیفلاسێ دچن، سالا بھێت ژی بھایێ پەترۆلێ ھەر دناڤبەرا ٥٠ ھەتا ٥٥ دۆلاران بیت و چ کارتێکرن ل سەر زێدەبوونا داھاتێ ئیراقێ نابن.
ھەولێر، قائید میرۆ
