نڤیسهرهكێ ب ناڤودهگێ تورك و دۆستێ گهلێ كوردستانێ راگههاند، پارتییا كاركهرێن كوردستانێ پهكهكه ب ههڤكارى د گهل میلیشیایێن حهشدا شهعبى دخوازیت شنگالێ ژ ههرێما كوردستانێ دووربێخیت و دوپات كر، پهكهكه ل سهر داخوازا وهلاتێن ئیران، ئیراق، توركیا و سووریێ دخوازیت قهوارێ ههرێما كوردستانێ تێكبدهت.
ئسماعیل بێشكچى، نڤیسهرێ ب ناڤودهنگ یێ تورك و دۆستێ دێرینێ گهلی كوردستانێ د گۆتارهكێ دا ب ناڤونیشانێ ههڤپشكییا پهكهكێ و حهشدا شهعبى ل ههرێما كوردستانێ، ئاماژه ب وێ یهكێ دا، حهشدا شهعبى نهیارا كورد و كوردستانێ یه، داعش چ بیت حهشدا شهعبى ههمان تشته، حهشد رێكخستنهك نینه ئێك بال بیت، بهلكو چهندین بال د ناڤ دا ههنه، لێ د ناڤ ههموو بالێن وێ دا ئێك تایبهتمهندى ههیه ئهو ژى نهیارێن كورد و كوردستانێ نه.
بێشكچى ئاشكرا ژى كر، پهكهكه ههڤپشكا حهشدا شهعبى یه و ههماههنگیێ د گهل دا دكهت، ب وێ یهكێ ژى دخوازیت دهستكهفتێن كوردان تێك بدهت و پێگههێ ههرێما كوردستانێ ژ ناڤ ببهت، ئهو ژى داخوازا ئیران، ئیراق، توركیا و سووریێ یه.
بێشكچى بهحس ل رۆلێ پهكهكێ د كارێن تێكدهر یێن ڤێ داویێ دا كر یێن ل سنۆرێ پارێزگهها سلیمانیێ ب ناڤێ خوهنیشادانان هاتینه كرن و گۆت: میدیایا پهكهكێ داخواز ژ جڤاتا نوونهرێن ئیراقێ كرییه كو هاریكار بن دا قهوارێ ههرێما كوردستانێ بههرفینن.
ل گۆرهى گۆتنا بێشكچى، میدیایا پهكهكێ روودانێن ڤێ داویێ بۆ مهرهمهكا دى دیار دكر، قهوارێ ههرێما كوردستانێ دكره ئارمانج و ب نووچه و مانشێتان خهلك هانددان تێكدانهكا زێدهتر بكهن، ب نووچهیێن خوه یێن ب زاراڤێن كرمانجى و سۆرانى ژى تۆرهبوونا گهنجان همبهرى بهغدا بۆ ههرێما كوردستانێ ئاراسته دكرن.
ئسماعیل بێشكچى، د گۆتارا خوه دا ئاشكرا ژى كر، میدیایا پهكهكێ گهلهك بهحس ل وێ یهكێ دكهت كو دهولهتێن توركیا، ئیران، ئیراق و سووریا دهولهتێن شهرعى نه، لێ ب گۆتنا وان ههرێما كوردستانێ شهرعیهت نینه، وێ گۆتنێ ژى ب تنێ وهلاتێن داگیركهرێن كوردستانێ وهكو ئیراق، توركیا، ئیران و سووریا دشێن بێژن.
بێشكچى گۆت ژى: پهكهكه بزاڤان دكهت د گهل حهشدا شهعبى شنگالێ ژ كوردستانێ دوور بكهن، پهكهكه نها ل شنگالێ بوویه پارێزهرا بهرژهوهندیێن ئیرانێ، د دهمهكى دا خهلكێ كوردستانێ قۆربانییهكا مهزن دایه ههتا گههشتینه قهوارێ خوهیێ نها.
ل گۆرهى گۆتنا بێشكچى، پێدڤییه ب شیوهیهكێ گهلهك پاقژ پێگههێ ههرێما كوردستانێ بهێته پاراستن، یێ بزاڤا ژناڤبرنا وى پێگههى ژى بكهت، ب تنێ دی خزمهتا نهیارێن كورد و كوردستانێ كهت، پێدڤییه پهكهكه ژى سهروهرییا ههرێما كوردستانێ بنیاسن، ههكه نهنیاسن ژى پێدڤییه وێ دهڤهرێ ب جهـ بهێلن.
