ئه‌ڤرۆ رۆژا ئێك شه‌مبى 20 كانیكا ئێكێ 2020 سه‌رۆكێ حكومه‌تا هه‌رێما كوردستانێ مه‌سرور بارزانى پێشوازیا نوینه‌را تایبه‌تا ئه‌میندارێ گشتیێ نه‌ته‌وێن ئێكگرتى ل ئێراقێ (جینین هینیس بلاسخارت)كر.
د كومبونێدا، به‌حسێ كاودانێن ئێراقێ و دوماهیك پێشهاتێن گرێدایى دانوستاندنان دناڤبه‌را حكومه‌تا هه‌رێما كوردستانێ و حكومه‌تا فیدرال كرن و ب تایبه‌ت چاره‌سه‌ركرنا ئاریشێن هه‌لاویستى دناڤبه‌را هه‌ردوو لایه‌ناندا.
سه‌رۆكێ حكومه‌تێ ئاماژه ب هندێ دا كو هه‌رێمێ چ بهانه بۆ حكومه‌تا به‌غدا نه‌هێلاینه سه‌خمه‌راتى چاره‌سه‌ركرنا ئاریشان دا كو بگه‌هنه رێكه‌فتنه‌كێ ل دووڤ بنیاتێ ده‌ستورى، و گۆتى: ب مخابنیڤه كێشا موچه‌یان وه‌ك پلێته‌كا فشارا سیاسى دژى خه‌لكێ كوردستانێ هاتیه بكارئینان.
وسه‌رۆكێ حكومه‌تێ داكوكى ل سه‌ر هندێ ژى كر كو حكومه‌تا فیدرال، ل سالا 2020 ێ تا نوكه پشكه‌كا موچه‌یان بۆ پتر ژ شه‌ش هه‌یڤانه نه‌فرێكریه.
و گۆت: ژبه‌ر هندێ ئه‌م داخوازێ ژ نه‌ته‌وێن ئێكگرتى دكه‌ین كو ئه‌و رولێ خۆ بینن سه‌خمه‌راتى گه‌هشتنا رێكه‌فتنه‌كێ دگه‌ل به‌غدا، و دابینكرنا مافێن داریى یێن هه‌رێما كوردستانێ و ل دووڤ ده‌ستورى.
هه‌روه‌سا د كومبوونێدا به‌حسێ جێبه‌جێكرنا رێكه‌فتنا شنگالێ كرن بۆ زڤراندنا ئیمناهیێ ل باژێرى و سه‌رۆكێ حكومه‌تێ داخوازكر كو رێكه‌فتن بهێته جێبه‌جێكرن، نه‌كو بتنێ هنده‌ك پێرابونێن وێنه‌داربن.
