سەلاحەدین دەمیرتاش د چارچوڤێ ڤه‌كولینێن تیرۆرێ دا ل چاری چریا دوویێ یا سالا 2016 هاتیه ده‌سته‌سه‌ركرن و زێده‌تىی چار سالایه ل زیندانا ئەدیرنا.
دادگه‌ها مافێ مرۆڤی ل ئەوروپا به‌رى بیستی چریا دوویێ یا دوهزارو هه‌ژدێ بڕیارا ئازادکرنا دەمیرتاشی دابوو، بەلێ دادگه‌ها تورکیا ل چاری کانینا ئێكێ دهه‌مان سالدا ل دۆسه‌یەكا دیدا ب تاوانا پڕوپاكندێ بۆ پەکەکێ بڕیارا زیندانکرنا دەمیرتاش دا و ئه‌و بریارا دادگه‌ها مافێ مرۆڤی ل ئەوروپا نه‌هاته جێبەجێ کرن.
ماهسۆنی کارامان، پارێزەرێ دەمیرتاش راگەهاند، چاڤه‌رێیه ئەڤرۆ دادگه‌ها مافی مرۆڤی ل ئەوروپا بڕیاره‌كا تووند لسەر وێ دۆسه‌یێ بده‌ت و تورکیا پابەند بکه‌ت ب جێبەجێکرنا بڕیارا ئازادکرنا سەلاحەدین دەمیرتاش.
دەمیرتاش تا نوكه د زیندانێدا سێ کتێب ب ناڤێ لەیلان، دەوران و سەهەر نڤیسینه و چاپكرینه و ئەو وێنێن ب ده‌ستى كێشاین ب رێكا تورێن كومه‌لایه‌تى به‌لاڤكرینه.
تانوكه چەندین جارا داخازا ئازادکرنا سەلاحەدین دەمیرتاش هاتیه‌كرن و ل دویڤ بڕیارێن دادگه‌ها مافێ مرۆڤی ل ئەوروپا و دادگه‌ها دەستووری ل تورکیا، پێدڤیه هاتبا ئازادكرن، بەلێ سه‌ره‌راى وان بریاران و کێشا ساخله‌میێ و بەردەوامیا ڤایروسێ کۆرۆنا کو مەترسی لسەر ژیانا وی ل ناڤ زیندانێ زێده‌كریه، دەمیرتاش هێشتا دزیندانێدایه.
