د هه‌یڤا بوورى دا، ب كێمى بیست و دو وه‌لاتیێن كورد ل رۆژهه‌لاتێ كوردستانێ داوى ب ژیانا خوه ئینایه.
رێكخستنا هه‌نگاو یا مافێن مرۆڤى راگه‌هاند، د هه‌یڤا بوورى دا ب كێمى بیست و دو وه‌لاتیێن كورد ل باژێرێن جودا یێن رۆژهه‌لاتێ كوردستانێ داوى ب ژیانا خوه ئینایه، ژیێ هه‌شت ژ وان كه‌سان ژى ل ژێر هه‌ژده سالیێ بوو.
ل گۆره‌ى راپۆرته‌كا رێكخستنا هه‌نگاو، د هه‌یڤه‌كێ دا، دوازده زه‌لام و ده‌هـ ژنان داوى ب ژیانا خوه ئینایه، ژیێ هه‌شت ژ وان كه‌سان ل ژێر هه‌ژده سالیێ بوو، ئه‌گه‌رێن خوه‌كوشتنا وان ژى بۆ كێشه‌یێن خێزانى و ئابوورى و هه‌ژاریێ ڤه‌گه‌راندن.
د راپۆرتێ دا هاتییه، ل پارێزگه‌ها ئیلامێ پێنج حاله‌ت كو ژنه‌ك و چار زه‌لامان داوى ب ژیانا خۆه ئینایه، ل پارێزگه‌ها كرمانشان ژى سێ حاله‌ت، دو ژن و زه‌لامه‌ك، ل پارێزگه‌ها سنه شه‌ش حاله‌ت كو ژنه‌ك و پێنج زه‌لام بوون، ل پارێزگه‌ها ئۆرمیێ ژى هه‌شت حاله‌ت، كو شه‌ش ژن و دوو زه‌لام بوون هاتینه تۆماركرن.
ده‌رباره‌ى ئه‌گه‌رێن خۆه كوشتنا وان كه‌سان ژى دیاركرییه، نه‌هـ حاله‌ت ژوان كێشێن خێزانى هه‌بوون، یازده حاله‌ت ژى ژ ئه‌گه‌رێ هه‌ژارى و بێكاریێ بوون، ئه‌گه‌رێ پێنج حاله‌تێن دى ژى نه‌دیاره.
ده‌رباره‌ى جورێن خۆه كوشتنێ ژى، راپۆرتا هه‌نگاو دیاركرییه، پازده كه‌سان ب رێكا خۆه هه‌لاویستنێ، دوو كه‌سان ب رێیا خوارنا ده‌رمانان، و دوو كه‌سان ب رێیا خۆه هاڤێتن ژ بلنداهیێ و چار كه‌سان ژى ب رێكا خۆه سۆتنێ، داوى ب ژیانا خۆه ئینایه.
