جێگرا سەرۆکێ فراکسیۆنا پارتی ل پەرلەمانێ کوردستانی بۆ خانی نیوز دیار کر: حکومەتا ئیراقێ بەردەوام ماددەیێن دەستوری بنپێ دکەت کرینە.
نەجات شەعبان ئامێدی، جێگرا سەرۆکێ فراکسیۆنا پارتی گۆت: بێ بھاکرنا دینارێ ئیراقی ل ھمبەر دولاری، چەکەکێ دو سەرە دێ بیتە ئەگەرێ ھەلدانا قەیرانەکێ د ناڤ قەیرانەکا ب زیانتر دا و بلندبوونا بھایێ دۆلاری ب رەنگەکی نەچاڤەرێکری بەرامبەر دینارێ ئیراقێ، کارتێکرنەکا نەرێنی دکەتە سەر تەخێن جڤاکێ بتایبەت یێن کێم دەرامەت زیانەکا ئێکسەر د گەھینیتێ و دبیتە ئەگەرێ زێدەبوونا رێژا ژێر ھێلا ھەژاریێ.
نەجات ئامێدی ئاشکرا کر، زەرەرمەندێن سەرەکی ژ ڤێ گوھۆرینێ وەلاتینە و پاشی بازرگان، ئەو یەک دێ کارتێکرنێ ل سەر ھەرێما کوردستانێ ژی کەت و راستەوخۆ زیانێ گەھینتێ، ژبەرکو ھەرێم دینارێ ئیراقێ ب کار دئینیت و پتریا کەلوپەلان ب دۆلارینە و دوکاندار نەچارن بھایێ کەلوپەلا زێدەبکەن بۆ زڤراندنا پارەی ب دۆلاری.
خویا ژی کر: بھایێ بەرھەمێ ناڤخوە دێ گرانتر لێھێت ژبەرکو کارگەھێن ناڤخوە کەرەستێن دەستپێکی بۆ بەرھەمئینانێ ب دۆلاری دکڕن دەرئەنجام وەلاتی زەرەرمەندێ ئێکێ یە.
جێگرا سەرۆکێ فراکسیۆنا پارتی ل پەرلەمانێ کوردستانی ئاشکرا کر، بریارا بانکا ناوەندیا ئیراقێ ژ نشکەکێ ڤە شاشاییەکا مەزن بوو و دڤیا رێکارێن داکەفتنێ گاف ب گاف ھاڤێتبان و گۆت ژی: پێدڤییە حکومەتێ رێژا کورتھێنانێ نێزیکی ١٦٪ کێمکربا ب رێکا چاکسازیا ئابووری و دارایی و کێمکرنا مەزاختنێ .
نەجات شەعبان ئامێدی دوپات کر، ھەردەم حکومەتا ئیراقێ ماددەیێن دەستووری بنپێ دکەت و بلندبوونا بھایێ دۆلاری ھمبەری دینارێ ئیراقی بەرۆڤاژی ماددەیێن ٣٠ و ٣١ ێ دەستووری ئیراقێ یە.
خانی نیوز، مەحمود نھێلی :
