ویلایه‌تێن ئێكگرتى یێن ئه‌مریكا سزایێن نوو ب سه‌ر ژماره‌یه‌كا به‌رپرس و كه‌سایه‌تیێن سووریا و به‌نكا ناڤه‌ندى یا وى وه‌لاتى دا سه‌پاندن.
مایك پۆمپیۆ، وه‌زیرێ ده‌رڤه یێ ئه‌مریكا د به‌لاڤۆكه‌كێ دا راگه‌هاند، سزایێن نوو یێن ویلایه‌تێن ئێكگرتى ل سه‌ر ژماره‌یه‌كا به‌رپرس و كه‌سایه‌تیێن سووریا هاتنه سه‌پاندن، ئێك ژ كه‌سێن دیار یێن هاتینه سزادان ئه‌سما ئه‌سه‌د، هه‌ڤژینا به‌شار ئه‌سه‌د خانما ئێكێ یا وى وه‌لاتى یه.
ناڤبری دیار ژى كر، وه‌لاتێ وى دێ ژ سزادانا وان كه‌سایه‌تییان به‌رده‌وام بیت یێن كار ژبو درێژكرنا شه‌رێ نافخۆ یا سووریا دكه‌ن.
وه‌زیرێ ده‌رڤه‌یێ ئه‌مریكا ئاشكه‌را ژى كر، ئه‌سما ئه‌سه‌د به‌رپرسه ژ هه‌ولێن رێگریكرنێ ژ گه‌هشتنا چاره‌سه‌ریێن سیاسى بۆ كێشا نافخۆ یا سووریا، ئه‌و سزا ژماره‌یه‌كا دى ژى یا ئه‌ندامێن خێزانا ئه‌سمایێ ڤه‌دگرن.
د دوماهى گه‌را سزایان دا، ئه‌مریكا ژماره‌یه‌كا كه‌سایه‌تى و ده‌زگه‌هێن سووریا ئێخستنه ناڤ لیستا ره‌ش دا.
ژ لایه‌كێ دى ڤه، وه‌زاره‌تا گه‌نجینه‌یا ئه‌مریكا ئاشكه‌راكر، سزایێن نوو دو ئه‌ندام و نه‌هـ ده‌زگه‌هێن بازرگانى و به‌نكا ناڤه‌ندى یا سووریا ئێخستنه د ناڤ لیستا ره‌ش دا.
ستیڤن منۆچن، وه‌زیرێ گه‌نجینه‌یا ئه‌مریكا ئاشكه‌راكر، یاسایا قه‌یسه‌ر یا دۆنالد ترامپ سه‌رۆكێ ئه‌مریكا یێ به‌رێ ئیمزاكربوو، پێنگاڤه‌كا گرنگه بۆ سزادانا رژێما ئه‌سه‌دى ل سه‌ر وان كاره‌ساتێن ل دژى گه‌لێ خوه ئه‌نجامداین.
وه‌زیرێ گه‌نجینه‌یا ئه‌مریكا ته‌كه‌زكر، وه‌زاره‌تا وى دێ به‌رده‌وام بیت ژ بكار ئینانا هه‌مى رێكێن به‌رده‌ست بو سزادان و شه‌رمزاركرنا وان كه‌سێن پشته‌ڤانییا ئه‌سه‌دى دكه‌ن بو به‌رده‌وامیدان ب تاوانێن خوه، و وه‌زاره‌تا ده‌رڤه یا ئه‌مریكا ژى سزا ب سه‌ر شه‌ش كه‌سێن دى دا سه‌پاندن.
ل گوره‌ى وێ به‌لاڤكرنێ، وه‌زاره‌تا گه‌نجینه‌یا ئه‌مریكا دڤێت رژێما سووریا نه‌چار بكه‌ت ب راگرتنا كارێن خوه یێن درندانه به‌رامبه‌ر گه‌لێ سووریا.
ویلایه‌تێن ئێكگرتى یێن ئه‌مریكا ل پشته‌ڤانیكرنا خه‌لكێ سووریا به‌ره‌وامه و ژ ده‌ستپێكا سه‌رهلدانا توندۆتیژییان ل وى وه‌لاتى تا نها، ئه‌مریكا دوازده ملیار دۆلار هاریكارى داینه وان وه‌لاتیێن سووریا یێن پێدڤى.
