جێگرێ سه‌رۆكێ حكومه‌تا هه‌رێما كوردستانێ و سه‌رۆكێ شاندێ دانوستاندكارێ هه‌رێمێ د گه‌ل به‌غدا، داخواز ژ حكومه‌تا فیدرال كر به‌رى داوى هاتنا سالی پشكا هه‌رێما كوردستانێ ژ بودجه‌ى دیار بكه‌ن و راگه‌هاند، دنوستاندنێن وان د گه‌ل حكومه‌تا به‌غدا شكه‌ستن نه‌ئینایه.
قوباد تاله‌بانى د پرێسكۆنفرانسه‌كى دا ل دۆر دانوستاندنێن شاندێ حكومه‌تا هه‌رێمێ د گه‌ل حكومه‌تا به‌غدا راگه‌هاند، ده‌مێ دو حه‌فتییانه شاندێ وان ل به‌غدایه بۆ بده‌ستڤه‌ئینانا شایسته‌یێن دارایى یێن خه‌لكێ هه‌رێما كوردستانێ و گۆت: ئه‌و ل سه‌ر پرۆژه‌قانوونا بودجه‌یا سالا دوهزار و بیست و ئێكێ رێككه‌فتینه.
قوباد تاله‌بانى گۆت ژى: دانوستاندن ل سه‌ر قانوونا پڕكرنا كورتهینانا دارایى كرینه كو بێى كوردان ئه‌و قانوون ده‌رباز بوویه، د گه‌ل وێ یه‌كێ ژى كورد رازى نه وه‌كو بهێته بجهئینان.
سه‌رۆكێ شاندێ دانوستاندكارێ حكومه‌تا هه‌رێمێ گۆت ژى: ئه‌و بۆ دانوستاندنێ ل سه‌ر قانوونا قه‌ران نه‌چووینه به‌غدا، ژبه‌ركو بوویه قانوون و ده‌رباز بوویه، به‌لكو ئه‌و بۆ بجهئینانا قانوونێ چووینه به‌غدا، ل سه‌ر راده‌ستكرنا داهاتێ په‌ترۆلێ و یێن نه‌په‌ترۆلێ ژى رازى بووینه، لێ همبه‌رى وێ پێدڤییه حكومه‌تا به‌غدا ژى پشكا هه‌رێمێ د بودجه‌ى دا ده‌ستنیشان بكه‌ت.
