سەرۆکێ حکومەتا ھەرێما کوردستانێ و وەزیرێ دەرڤەیێ ئەمریکا ب رێیا پەیوەندییەکا تێلەفۆنی ئالۆزیێن ھەولێرێ و بەغدایێ گۆتوبێژکرن و دوپات کر کو پێدڤییە رێککەفتنا شنگالێ بھێت بجھئینان.
مەسروور بارزانی و مایک پۆمپێیۆ د پەیوەندییەکا تێلەفۆنی دا ئالۆزیێن حکومەتا ھەرێمێ و حکومەتا فیدرال و ب تایبەت پرسا بودجەی گۆتوبێژ کرن، سەرۆکێ حکومەتا ھەرێمێ ژی پێشنیاز کر ئەمریکا و نەتەوەیێن ئێکگرتی و ب شێوەیەکێ کارا و ل ئاستێن بلند پشکداریێ د چارەکرنا کێشێن ھەولێرێ و بەغدایێ دا بکەن، دا ل گۆرەی دەستووری بگەھن رێککەفتنێ.
مەسروور بارزانی سوپاسییا ھەلویستێ وەزیرێ دەرڤەیێ ئەمریکا کر یێ داخواز کری ب شێویەکێ دادپەروەرانە ھەرێما کوردستانێ پشکا خوە ژ بودجەیا ئیراقێ وەرگریت، ھەروەسا سوپاسییا وی بۆ بەردەوامییا پشتەڤانییا ھەرێما کوردستانێ کر.
سەرۆکێ حکومەتا ھەرێما کوردستانێ و وەزیرێ دەرڤەیێ ئەمریکا دوپاتی ل پێشڤەبرنا پەیوەندیێن ھەولێرێ و واشنتۆنێ کر ب تایبەت د وارێ وزێ دا، ئاماژە ژی ب گرنگییا بەردەوامییا پشتەڤانییا ئەمریکا بۆ ھێزێن پێشمەرگەی کر.
د ئالییەکێ دی یێ پەیوەندیێ دا، مەسروور بارزانی و مایک پۆمپێیۆ ئاستەنگێن ھمبەری سەقامگیریا دەڤەرێ و نەھێلانا ئالۆزیان ل سەر سنۆرێ ھەرێمێ و سورریێ و گرنگیا بجھئینانا رێککەفتنا ئاساییکرنا رەوشا شنگالێ کر، بۆ وێ یەکێ ئاوارە ڤەگەرن سەر مال و حالێن خوە.
