بڕیار بوو ل گۆرەی قانوونا تاپۆکرنا خانیێن زێدەگاڤی د دەمێ شەش ھەیڤان دا مامەلەیێن وەلاتیان بھێنە وەرگرتن و د دووڤ دا پرۆسا تاپۆکرن دەسپێبکەن، پەیڤدارێ وەزارەتا باژێڕڤانی ژی ئاشکراکر، ڤایرۆسێ کۆرۆنایێ رێگر بوویە ھەمبەر تاپۆنەکرنا خانیێن زێدەگاڤی.
کوردۆ شابان، پەیڤدارێ وەزارەتا باژێرڤانی بۆ خانی نیوز دیارکر، پشتی پەسەندکرنا قانوونا تاپۆکرنا خانیێن زێدەگاڤی ژلایێ پەرلەمانێ کوردستانێ ڤە، حکومەتێ کار بۆ بجھئینانا قانوونێ کر، ھەتا ھەموو خانیێن زێدەگاڤی ل گۆرەی قانوونا زێدەگاڤیان بھێنە تاپۆکرن و بھزاران مامەلە ژی ژلایێ وەلاتیان ڤە پێشکێشی یەکەیێن ئیداری و باژێرڤانییان ھاتینەکرن.
کوردۆ شابان ئاماژە کر، ئەڤسالە ژبەر قەدەغەیا دەرکەفتنێ و راگرتنا دەوامێ، حکومەت نەشیا وەک پێدڤی مامەلەیێن وەلاتیان بۆ تاپۆکرنا خانیێن زێدەگاڤی رێڤەببەت، لەورا بریارە قانوون بھێتە راستڤەکرن، بەلێ ھێشتا چ پڕۆژە نەگەھشتینە وەزارەتێ.
ل گۆرەی قانوونا تاپۆکرنا خانیێن زێدەگاڤی ھەر خانیەکێ بەری ھەیڤا شوباتا ٢٠١٨ێ ھاتبیتە ئاڤاکرن، دێ ھێتە تاپۆکرن و پێشبینی دھێتەکرن نێزیکی ٣٠٠ ھزار خانیێن زێدەگاڤی ل سەرانسەری ھەرێما کوردستانێ ھەبن.
ھەولێر، قائید میرۆ
