سەندیکا دەرمانسازان: بھایێ دەرمانان ژ به‌ر بلندبوونا دۆلاری ٢٠% زێدەبوویە

سەندیکا دەرمانسازێن ئیراقێ راگەھاند: بھایێ دەرمان و پێدڤیێن پزیشکی ژ بەر  بلندبوونا دۆلارێ ئەمریکی،  ب رێژەیا ٢٠% زێدەبوویە.
ئەمجەد حەسیب، جێگرێ نەقیبێ سەندیکا دەرمانسازێن ئیراقێ د داخویانییەکێ دا راگەھاند؛ ژ بەرکو ئینانا دەرمانان ب رێکا بریکارێن وان و دابەشکرنا وان ب سەر کۆگەھان دا کو ھەموو ب رێکا دۆلاری دھێن کرین و فرۆتن و ھەر گھۆرینەک د بھایێ دراڤی دا کارتێکرنا خوە ل سەر بھایێ دەرمانان ھەیە چونکە پتریا وان ژ دەرڤەیێ وەلاتی دھێن.
دیار کرییە، پێشتر ب ھەماھەنگی د گەل وەزارەتا ساخلەمیێ بھایێ دەرمانان ل کۆگەھـ و دەرمانخانان ب دیناران ھاتبوو رێکخستن بەلێ ژ بەر بلندبوونا بھایێ دۆلاری بھایێ دەرمان و کەل و پەلێن پزیشکی ب رێژەیا ١٧.٥ تا ٢٠% زێدەبوویە و د پرۆسەیێ دا نەخۆش زەرەرمەندێ ئێکێ یە.