ئەندامەکێ پەرلەمانێ کوردستانێ ل فراکسیۆنا پارتی دیارکر، دەمێ ۲۹ سالانە تاکو نھا خەلکێ دەڤەرا ئامێدیێ نەشیاینە مفای ژ داھاتێ گوندێن خوە ببینن و گوندێن وان د چوول و وێرانکرینە و بەردەوام ئاگر و ئاسن ل سەر دباریت و دھێنە سۆتن و وێرانکرن ژلایێ توپخانە و فرۆکەیێن سوپایێ تورکیا ب بھانەیا ھەبوونا بنگەھ و بارەگایێن پارتیا کارکەرێن کوردستانێ پەکەکێ.
محسن دۆسکی، پەرلەمانتارێ پارتی و ئەندامێ لێژنا ناڤخوە و ئاساییشێ بۆ خانی نیوز گۆت:
دەڤەرا ئامێدیێ د مەترسیەکا مەزن دایە، مەترسیا نەمانا ئارامیێ یە ل سنۆرێ وێ قەزایێ ھەیە ژبەر تۆپبارانێن بەردەوام یێن فرۆکەیێن سوپایێ تورکیا ب بەھانەیا ھەبوونا بنگەھ و بارەگەھێن گەریلایێن پەکەکێ، ب تایبەت ل گوند و وارێن ڤێ دەڤەرێ، کو پتریا خەلکی نەشێن سەرەدانا گوندێن خوە بکەن بۆ گەشت گوزارێ و چاندن و ئاژەلداریێ، د سالێن بووری دا پتر ژ ۳۰ وەلاتیێن سڤیل یێن سنۆرێ قەزا ئامێدیێ شەھید کرینە، حکومەتا فیدرال ژی ژ ڤان جۆرە کارەساتان بێدەنگی ھەلبژارتیە، ب مخابنی ڤە خەلکێ دەڤەرێ یێ باجا شاشیا وان ھەردو ھێزان ددەن.
محسن دۆسکی زێدەتر گۆت: ئێک ژ فاکتەرێن بھێزکرنا ئابووری، ھەبوونا ئارامیێ یە ژبەرکو پتریا کۆمپانی و فاکتورێن کەرتێ تایبەت ل جھێن ئارام خوەجھـ دکەن داکو قازانج و داھاتێ وانێ مسۆگەر بیت و چ ئاستەنگ بۆ دروست نەبن، ژ ئالیەکێ دی ڤە خەلکێ ڤان دەڤەرێن چیایی ژی بارێ دارایی یێ وان لاوازە، لەوما نەچار دبن سەرەدانا ڤان جھێن نەئارام بکەن بۆ پەیداکرن و بدەستڤەئینانا داھاتەکی بۆ خێزانێن خوە، لێ گەلەک جاران ژی دکەڤنە بەر پێلا بۆمبەبارانێن سوپایێ تورکیا و شەھید دبن.
ئەندامێ لێژنا ناڤخوە و ئاساییشێ ئاشکرا ژی کر، بەری چەند ھەیڤان وان داخوازا خەلکێ دەڤەرێ گەھاندیە سەرۆکاتیا پەرلەمانێ کوردستانێ، سەرۆکاتیا پەرلەمانی ژی لێژنا ناڤخوە و ئاساییشێ راسپارد بوو سەرەدانا ڤێ دەڤەرێ بکەن داکو بزانن زەرەر و زیان چنە و چارەسەری دێ چبیت، راپورتەک ژی ل سەر رەوشا وێ دەڤەرێ بۆ سەرۆکاتیا پەرلەمانی ھاتبوو بلند کرن، خەلکێ دەڤەرا ئامێدیێ ب تایبەتی سنۆرێ ناحیا شێلادزێ چەندین سالە زیانەکا مەزن ببەرکەفتییە، لەورا پێدڤیە بھێنە قەرەبۆکرن.
خانی نیوز، ئێقبال عومەر:
