رێڤەبەرێ کەنالێ ئێن ئار تی ل دەمێ ڤەگەریانێ ژ وەلاتێ سوێدێ ل فرۆکخانەیا ناڤدەولەتی یا ھەولێرێ ژ ئالیێ ھێزێن ئێمناھیێ ڤە ھات دەستەسەرکرن، کارمەندێن وی کەنالی ژی ئەگەرێن دەستەسەرکرنێ نزانن، پشتی دەمەکێ کێم ژی ھات ئازادکرن.
رێبوار ئەورەحمان، رێڤەبەرێ بەرنامەیان ل کەنالێ ئێن ئار تی بۆ خانی نیوز ئاشکرا کر، ئاوات عەلی، رێڤەبەرێ کەنالێ ناڤبری ل دەمێ ڤەگەریانێ ژ وەلاتێ سوێدێ ل فرۆکخانەیا ھەولێرێ ژ ئالیێ ھێزێن ئێمناھیێ ڤە ھات دەستەسەرکرن.
ئەورەحمان ئاشکرا ژی کر، تا نھا بۆ وان دیار نینە بۆچی ھاتیە دەستەسەرکرن، ئالیێن ئێمناھیێ ژی چ رۆھنکرن ل سەر دەستەسەرکرنا وی نەداینە، پشتی چەند سەعەتان ژ دەستەسەرکرنێ ، ئاوات عەلی ھات ئازادکرن.
پێشتر وەزارەتا رەوشەنبیری و لاوان یا حکومەتا ھەرێما کوردستانێ بۆ دەمێ دو حەفتییان کەنالێ ئێن ئار تی داخست بوو، ژبەرکو د خوەنیشادانێن سلێمانیێ و ھەلەبجە دا پێگیری ب رێنمایان نەکربوو و وێنە و ڤیدیۆیێن توندوتیژیێ بەلاڤ کر بوون.
خانی نیوز، عەزیز ھەورامی
