په‌رله‌مانتاره‌كا فراكسیۆنا پارتی ل په‌رله‌مانێ كوردستانێ راگه‌هاند، كه‌ركووك همبه‌رى پیلان و ترسه‌كا نوو دایه و شۆفینى بزاڤا هه‌رێمكرنا وێ پارێزگه‌هێ دكه‌ن.
لیزا فه‌له‌كه‌دین كاكه‌یى، ئه‌نداما لژنا ده‌ڤه‌رێن كوردستانى یێن ده‌رڤه‌ى ئیدارا هه‌رێمێ ل په‌رله‌مانێ كوردستانێ د گۆتاره‌كێ دا راگه‌هاند، ده‌مه‌كه ئه‌و هه‌ست پێدكه‌ن هنده‌ك ده‌نگێن نه‌شاز ب رێیا هنده‌ك ئالیێن خوه‌سه‌پینه‌ر به‌رده‌وام پیلان و به‌رنامان دژى كوردستانیبوونا كه‌ركووكێ دادرێژن، هه‌ر ژ دروستكرنا حه‌شدا كوردى تا دگه‌هیته هه‌لوه‌شاندنا ماددێ سه‌د و چل یێ ده‌ستوورێ ئیراقێ، بزاڤێن شۆفینییان ژى به‌رده‌وامن كو ب رێیا پرۆژه‌یه‌كى پارێزگه‌ها كه‌ركووكێ بكه‌نه هه‌رێمه‌كا سه‌ربخوه.
لیزا فه‌له‌كه‌دین كاكه‌یى ئاشكرا كر، پرسا هه‌رێمكرنێ د ده‌ستوورێ ئیراقێ دا رێ دهێته دان پارێزگه‌هه‌ك یان پتر هه‌رێمه‌كێ پێكبینن ب رێیا رێفراندۆمێ، لێ پێدڤییه ب دو رێیان ئه‌و داخوازى بهێت پێشكێشكرن.
ئێك ژ وان رێیان ژى ئه‌وه ئێك ل سه‌ر سێ یا ئه‌ندامێن جڤاتا پارێزگه‌هێ وێ داخوازێ بكه‌ن، لێ ژبه‌ركو كارێن جڤاتا پارێزگه‌ها كه‌ركووكێ هاتینه راگرتن ئه‌و یه‌ك ناهێت كرن، یا دویێ ژى پێدڤییه ئێك ل سه‌ر ده‌هێ یا وه‌لاتیێن وێ پارێزگه‌هێ داخوازا پێكئینانا هه‌رێمێ بكه‌ن، هه‌ژمارا ئاكنجیێن وێ پارێزگه‌هێ ژى ملیۆن و نیڤه، ئانكو پێدڤیه سه‌د و پێنجى هزار كه‌س وێ داخوازێ بكه‌ن و مه‌ترسى د وێ یه‌كێ دایه، ژبه‌ركو پشتى دوهزار و هه‌ڤدێ گه‌له‌ك عه‌ره‌ب ڤه‌گوهاستینه وێ پارێزگه‌هێ و پلێتا ئاهێن خوارنێ بۆ هاتیه دروستكرن دا بشێن پشكداریێ د ده‌نگدانێ دا بكه‌ن بۆ پرسێن چاره‌نڤیسسازێن كه‌ركووكێ، له‌ورا پێدڤییه كورد ئاگه‌هدارى وان پیلانان بن و ب رژدى وه‌رگرن.
ل گۆره‌ى گۆتنا لیزا فه‌له‌كه‌دین كاكه‌یى، پێدڤییه كورد ژ هه‌موو ده‌مه‌كى پتر نها ئێكگرتى بن و ب ئێك گۆتار به‌رسینگێ وى شه‌رێ سیاسى بگرن كو پلانا بۆ عه‌ره‌بكرنا كه‌ركووكێ ددانن.
په‌رله‌مانتارا كوردستانێ گۆت ژى: سێ ساله پارێزگارێ سه‌پاندیێ كه‌ركووكێ ره‌وشا ئالۆزا وێ پارێزگه‌هێ ب ده‌لیڤه دبینیت و ب رێیێن جودا نه‌دادپه‌روه‌ریێ همبه‌رى پێكهاتێن كه‌ركووكێ و ب تایبه‌ت كوردان دكه‌ت، ژبه‌ركو گه‌له‌ك كه‌یسێن گه‌نده‌لیێ ژى ل سه‌ر هه‌نه، دخوازیت ب رێیا هه‌رێمكرنا كه‌ركووكێ خوه ژ وان كه‌یسان رزگار بكه‌ت.
