پشتی ھەژمارەکا چەکدارێن میلیشیایێن عەسائیب ئەھلولحەق ب تۆمەتا ھێرشکرنا سەر بالیۆزخانەیا ئەمریکا ژ ئالیێ ھێزێن ئێمناھییا ئیراقێ ڤە ھاتینە گرتن، عەسائیب ھەژمارەکا چەکداران ل ناڤا بەغدا بەلاڤکرینە و گەف ل حکومەتێ کرینە ھەکە چەکدارێن وان نەھین ئازادکرن، سەرۆکوەزیران ژی بەرھەڤییا خوە بۆ روو ب رووبوونێ دیار کرییە.
ھێزێن ئێمناھییا ئیراقێ ل ناڤا باژارێ بەغدا ھاتینە بەلاڤکرن و میلیشیایێن عەسائیب ئەھلولحەق مۆلەتا دو رۆژان دایە حکومەتێ چەکدارێن وان ئازاد بکەن، ھەکە نە دێ ھێرشێ کەنە سەر کرێگرتیێن ئەمریکا وەکو وان ئاماژە کری، سەرۆکوەزیران ژی رکمانییا وان دکەت و بەرھەڤییا خوە بۆ ئێکلاکرنا ھەموو پرسان دیار کر.
مستەفا کازمی، سەرۆکوەزیرێن ئیراقێ د تویتەکی دا ئاماژە ب وێ یەکێ کر کو ئەو د بزاڤین خوەدا بۆ ڤەگەراندنا باوەریا خەلکی و سازیێن ئەمنی و سوپای ب دەولەتێ سەرکەفتی بووینە.
تویتا کازمی ھات پشتی ھەژمارەکا چەکدارێن سەرۆچاڤ پێچای ل ناڤا بەغدا بەلاڤ بووین و خوە وەکو عەسائیب ئەھلولحەق دایە نیاسین و ئاشکرا کری، ئەو چاڤەرێ ئێک ئاماژەنە ژ قەیس خەزعەلی، سەرکردێ وێ گرۆپێ میلیشیایان کو ھێرش بکەنە سەر کرێگرتیێن ئەمریکا، وەکو ئاماژەیەک بۆ حکومەتا ئیراقێ.
ل گۆرەی ئاگاھیێن میدیایا ئیراقی، چەکدارێن سەر ب عەسائیب ئەھلولحەق ب جلکێن سەربازی ل جادە و کولانێن بەغدا دگەرن و ترسا شەر و پەڤچوونان د ناڤبەرا وان و ھێزا دژەتیرۆرا ئیراقێ دا ھەیە.
ژ ئالیێ خوەڤە موقتەدا سەدر، سەرۆکێ رەوتا سەدر د تویتەکی دا راگەھاند، ئیراق بوویە قوربانییا ململانا ئەمریکا و ئیرانێ و زیانەکا مەزن گەھشتیێ، ئەگەر ژی بۆ لاوازبوونا حکومەتێ و پارچەبوونا گەلێ ئیراقێ زڤراندن.
شڤێدی ژی پێنج گرۆپێن میلیشیایێن حەشدا شەعبی د گەل قاسم ئەعرەجی، شیرەتکارێ ئاساییشا نشتیمانییا ئیراقێ کۆمبووینە و داخوازا دەرخستنا ھێزێن ئەمریکی کرییە.
ژ ئالییەکێ دی ڤە مایک پۆمپێیۆ، وەزیرێ دەرڤە یێ ئەمریکا مستەفا کازمی، سەرۆکوەزیرێن ئیراقێ ئاگەھدار کرییە، کو ئێک ھێرشا دی ل سەر بنگەھێن ئەمریکی بھێتە کرن، دێ بالیۆزخانەیا خوە دائێخن، کازمی ژی بەرھەڤییا خوە بۆ ئێکلاکرنا روودانان دیار کرییە.
