شیرەتکارەکێ سەرۆکوەزیرێن ئیراق راگەھاند، ب چ شێوان حکومەتا ئیراق جارەکا دی بھایێ دیناری ھمبەری دۆلاری کێم ناکەت.
مزھر محەمەد سالح، شیرەتکارێ مسەفا کازمی سەرۆکوەزیرێن ئیراقێ بۆ کاروبارێن دارایی راگەھاند: ئەو نووچەیێن بەحس ل وێ یەکێ دکەن کو جارەکا دی بھایێ فرۆتنا دۆلاری ب دینارێ ئیراقی دھێتە زێدەکرن، راست نینن، بھایێ وێ د نھا دا جێگیرە و ناھێتە گوھۆرین.
دەمێ حکومەتا ئیراقێ د ناڤەراستا مەھاچریا ئێکێ یا بووری بھایێ دینارێ ئیراقی ھمبەری ھەر دۆلارەکی ژ ھزار و سەد و ھەشتێ و چار دیناران بۆ ھزار و چارسەد و چل و پێنج دیناران زێدەکر، جارەکا دی دەنگۆیێ ھندێ ھەیە، حکومەتا ئیراقێ بھایێ دیناری کێمتر بکەت، ئەڤێ ژی ئالۆزی د بھایێ دیناری دا ھمبەری دۆلاری دروستکریە.
توکیر میرزۆییڤ، سەرۆکێ تیما ھنارتی یا سندۆقا نەختێ ناڤدەولەتی پشتەڤانیا خوە بۆ بریارا حکومەتا ئیراق یا تایبەت ب نزمبوونا بھایێ دیناری راگەھاند، ژبەرکو پشتی بەلاڤبوونا ڤایرۆسێ کۆرۆنایێ و نزمبوونا داھاتێ پەترولێ، ترسێن مەزن دروست بووینە و بووینە گەف ل سەر ئابوورێ ئیراقێ.
توکیر گۆت ژی: بەردەوامبوونا چاکسازیان د قوناغێن بھێن دا، دگەل پێکڤە گرێدانا کەرتان، دێ کارتێکرنەکا مەزن د پاشەرۆژا نێزیک دا ھەبیت، ژبەر وێ یەکێ ئەو بەرھەڤن بزاڤان بکەن بۆ پشتەڤانیا چاکسازیێ ل ئیراڤێ.
