خودانکرنا تەرش و کەوالی ل ناڤا سەنتەرێ باژارێ شێلادزێ بوویە دیاردە و خەلک ژێ بێزار بوویە، تا نھا ژی باژێرڤانییا وی باژارێ چ چارە بۆ وێ یداردێ نەدیتینە.
ئەحمەد شامکی، چالاکڤانەکە بۆ خانی نیوز دیار کر، خودانکرنا تەرش و کەوالی د ناڤ سەنتەرێ باژاری دا دبیتە ئەگەرێ پیسبوونا جادە و کولانێن باژێری، باژێرڤانی ل لایەکی دار و گولان دچینن و ل لایێ دی چێل و ھەسپ د خون و ژناڤ دبەن، خودانکرنا تەرش و کەوالی د ناڤ باژێری دا نیشانێن پێشکەفتنێ نینن ، ژبەرکو خەلکەک بخوە دبنە ئەگەرێ ژناڤبرن و تێکچوونا جوانی و پاقژیا باژارێ خوە، لەوما دخوازن ھەر کەسێ دناڤ ڤی باژاری دا دژیت د ھاریکاربن و کەسێن ئاژەلان ژی خودان دکەن ببەنە ژدەرڤەی باژێری.
ئەندازیار سەربەست حسێن، سەرۆکێ باژێرڤانیا شێلادزێ بۆ خانی نیوز گۆت: ھەبوونا گۆڤێن ئاژەلان د ناڤ مالان دا ل ل ناڤا باژارێ شێلادزێ، کارتێکرن ل سەر جوانی و سەرو سیمایێ باژێری و ساخلەمیا گشتی یا وەلاتیان ھەیە، دێ بزاڤێ کەن ل گەل رێڤەبەریا ناحیا شێلادزێ کو چارەکێ بۆ ڤی بابەتی ببینن و جھەکێ بۆ دابین بکەن ژ دەرڤەی باژێری.
ئەندازیار سەربەست حسێن گۆت: ئەگەر خودانێن گۆڤێن ئاژەلان ل گەل وان د ھاریکار بن دێ بۆ شێلادزێ و سیریێ دو جھێن تایبەت بۆ دروستکرنا گۆڤێن ئاژەلان دابین کەن دوور ژ جھێن وەلاتیان.
خانی نیوز، ئێقبال عومەر:
