ئەنستتیوتەکا سەر ب زانکۆیا سەسسێکس یا بریتانی ڤە ب ھەڤکاری ل گەل زانکۆیا دھۆکێ مژوولی پرۆژەکێ نەھـ ھەیڤی نە بۆ ئەرشیفکرنا رەوشت و تیتال و ئەدەب و کولتور و ھەر تشتەکێ گرێدایی ئۆلێن د ناڤا پارێزگەھێ دھۆکێ دا دژین.
زەینەب سەید سالح، ئێک ژ راھێنەرێن پرۆژەی یە ل گەل کۆمەکا مامۆستایێن زانکۆیا دھۆکێ بۆ خانی نیوز گۆت: ڤی پرۆژەی کۆمەکا گەنجان ژ کچ و کوران ژ ئۆلێن ئێزیدی، کرستیان، کلدانی، ئاشووری و زەرەدەشتی بخوەڤە دگریت و ل ژیێن (١٨-٣٥) سالیێ نە و ئارمانج ئەوە ئەدەب و ستران و کولتور و ھەر تشتەکێ گرێدایی ئەڤان ئۆلان بھێتە پاراستن.
گۆت ژی: پرۆژە نەھـ ھەیڤن و ئەڤ ئەنستتیوتە نێزیکی رێکخستنا یونسکو یە و ئەڤ کارە ل گەل زانکۆیا دھۆکێ دھێتەکرن و دێ مفای گەھینتە زانکۆیا دھۆکێ ژی و دێ ئەرشیفەکێ بەرزە و بەر ب نەمانێ ھێتە پاراستن و ئەڤ بابەتە دێ ل مالپەرێن زانستی ل دەڤەرێ ھێنە بەلاڤکرن.
مامۆستا زانکۆیا دھۆک زەینەب سەید سالح ئاشکرا ژی کر، ئێک ژ ئارمانجێن سەرەکی یێ پرۆژەی ئەوە ل سەر شیانێن گەنجان کار بکەن و ئەڤ دژایەتیا کەلتورێ ھاتیەکرن ئێدی نەمینت و بھێتە پاراستن و ھەر تشتەکێ گرێدایی رەوشت و تیتال و ژیانا وان ئۆلان دێ ھێتە پاراستن، ئارمانجەکا دی ژی ئەوە خواندنەکا دی ژ روویێ ھزری و فەلسەفی ڤە بۆ ئەڤان بابەتان بھێتەکرن و ژناڤچوونێ بھێنە پاراستن.
