ئاساییشا کەرکووکێ راگەھاند، داعش ژ روویێ لۆجستی ڤە بوویە مەترسیەکا مەزن و ھەژمارا وان ژی بەردەوام د زێدەبوونێ دایە.
عەمید ئدریس رەفعەت، رێڤەبەرێ ئاساییسا کەرکووکێ بۆ خانی نیوز راگەھاند، پشتی خیانەتا شازدەی ئۆکتۆبەرا سالا دوھزار و ھەڤدێ، رەوشەکا نەئارام یا ئیداری و سەربازی ل کەرکووکێ پەیدابوویە، ل گۆرەی وان ئامارێن ل بەردەست یێن کریارێن تیرۆرستی، رەوشەکا نەخواستی یا ئەمنی ل کەرکووکێ ھەیە و رێکخستنا تیرۆرستی یا داعشێ رۆژانە پتر ب ھێز دکەڤیت.
ئدریس رەفعەت ئاماژە ب وێ یەکێ ژی دا، د دەمێ بووری دا دگۆتن شانێن نڤستی یێن داعشێ ل حەویجە و داقوق و دووزخورماتۆ و ناحیێن رەشاد و عەباسیە و زاب و چیایێ حەمرین ھەنە، لێ نھا مەترسییا داعشێ ھاتییە ناڤخوەیا کەرکووکێ و داعش ل جادا سەرەکی یا کەرکووک ھەولێر دەربازبووینە و چووینە دەڤەرا شوان و کریارێن تیرۆرستی کرینە، کو پیشتر چو دەمان داعش نە گەھشتبوونە وێ جادێ.
رێڤەبەرێ ئاساییشا کەرکووکێ گۆت ژی، چەند ئەگەرەک ھەنە بۆ بھێزبوونا داعشێ ل کەرکووکێ، بەری شازدەی ئۆکتۆبەرێ، پێشمەرگەی پشتینەکا ئەمنی یا ب ھێز دروست کربوو ژ پردێ تا دووزخۆماتۆ، کۆمبوونێن حەفتیانە یێن ھێزێن ئەمنی دھاتنە کرن و گرۆپ و شانێن نڤستی یێن داعشێ دھاتنە دەستەسەرکرن.
ئدریس رەفعەت ئاشکرا کر، ئەو ھێزێن ئیراقی یێن ل کەرکووکێ، خەلکێ دەڤەرێ نینن بەلکو خەلکێ ژێری و ناڤەراستا ئیراقێ نە و شارەزای جوگرافییا دەڤەرێ نینن، ئەو یەک ژی بوویە ئەگەر داعش خوە ل سنۆرێ دەڤەرێ رێکبێخن.
ل گۆرەی گۆتنا ئدریس رەفعەت راگەھاندنا سەرکەفتن و ب داوی ھاتنا داعشی ل ئیراقێ دروست نەبوو، ھێزێن ئیراقی ب تنێ د ناڤ جادێن قێری دا ھاتینە باژێری و نەشیاینە ھەمی دەڤەرێ پاقژ بکەن، د ھەموو ئۆپەراسیۆنێن ھێزێن ئیراقی دا نەھاتییە دیتن دەست ب سەر کوگەھەکا چەکی دا بھێتە گرتن یان سەرکردێن داعش بھێنە دەستەسەرکرن.
زێدەتر گۆت، ئەو ھێزێن نھا ل کەرکووکێ، ھندی مژوولی بەرژەوەندیێن خوە و عەرەبکرنا دەڤەرێن کوردی نە، مژوولی لێگەریانا گرۆپێن تیرۆرستی یێ داعشێ نینن.
خانى نیوز، عهزیز ههورامى
