فه‌رمانداره‌كێ په‌كه‌كێ به‌حسێ ئامارێن روودانێن سالا 2020ێ كر ب تایبه‌ت یێن گه‌ریلایێن ژن و راگه‌هاند، د 11 هه‌یڤێن ڤێ سالێ دا 112 هه‌ڤالێن وان یین ژن د روو ب رووبوونێن به‌رامبه‌رى دوژمنان گیانێ خۆ ژ ده‌ست داینه.
زۆزان چه‌ولیك، فه‌رماندا بریارگه‌ها ناڤه‌ندیا یه‌ژاستارى سه‌ر ب میدیایا پارتیا خوه ڤه راگه‌هاندییه، پارتیا كاركه‌رێن كوردستانێ ژبه‌ر ڤایرۆسێ كۆرۆنایێ وه‌رگرتنا گه‌ریلایان راگرت بوو، به‌لێ 160 ژن پشكدارى د رێزێن گه‌ریلایان دا كربوون و دناڤ شه‌ران ژى دا د ئاماده‌بوون، تا نها ژى چاره‌نڤیسێ دو ژ هه‌ڤالێن وان نه‌دیاره و دو ژ وان ژى هاتینه گرتن، چار ژ وان ژى خۆ راده‌ستى هێزێن دوژمنى كرییه.
ژ ئالیێ خوه‌ڤه خلۆسى ئاكار، وه‌زیرێ به‌رگرییا توركیا ئه‌ڤرۆ رۆژا چوارشه‌مبى 30-12-2020ێ ئامارا نوو یا شه‌رێن توركیا د گه‌ل په‌كه‌كێ به‌لاڤكرینه و راگه‌هاند، ئه‌ڤساله زێده‌تر ژ 200 ئوپه‌راسیۆنان ل توركیا و ده‌وروبه‌رێن وێ دژى په‌كه‌كێ كرینه و سێ هزار و 646 گه‌ریلا هاتینه كوشتن.
رۆژا 19-12-2020ێ ، ناڤه‌ندا راگه‌هاندنێ و چاپه‌مه‌نیێ یا هێزێن پاراستنا گه‌ل هه‌په‌گێ ئامار و چالاكێن خۆ یێن سه‌ربازى و پاراستنا گه‌ل و ئوپه‌راسیونێن ئه‌سمانى و ئه‌ردى یێن سوپایێ توركیا ل باكوورى و باشوورێ كوردستانێ به‌لاڤكرن و راگه‌هاند بوو: ئه‌ڤ ساله 946 سه‌ربازێن سوپایێ توركیا هاتینه كوشتن و د به‌رامبه‌ردا 227 گه‌ریلا ژ لایێ سوپایێ توركیاڤه هاتینه كوشتن.
و ل دویڤ وێ راگه‌هاندنێ ژى، ژ ئه‌گه‌رێ هێرشێن سوپایێ توركیا بۆ سه‌ر باشوورێ كوردستانێ، دو فه‌رماندارێن سه‌ربازى یێن سوپایێ ئیراقێ و 24 هاوه‌لاتیان گیانێ خۆ ژ ده‌ست داینه و دناڤ وان ژى دا دو ژن و چوار زارۆك بوون.
راگه‌هاندنا ئه‌ڤان ئاماران د ده‌مه‌كی دایه كو هه‌تا نوكه ژى فرۆكه‌یێن شه‌ركه‌رێن توركیا ده‌ڤه‌رێن باشوورێ كوردستانێ و ئه‌و جهێن په‌كه‌كه لێ هه‌ین ب رێكا فرۆكه و تۆپان هێرشێ دكه‌نه سه‌ر، و دوماهیك هێرش ژى ئه‌ڤرۆ رۆژا چوار شه‌مبى فروكێن توركیا چیایێ بێسمتێ ل ده‌ڤه‌را به‌رێگاره‌یى سه‌ر ب ناحیا دێره‌لوكێ ڤه ل قه‌زا ئامێدیێ و ده‌ردۆرا گوندێ كێسته ل ده‌ڤه‌را به‌روارى بالا تۆپبارانكرن.
